Federata Angleze e Futbollit i ka kërkuar presidentit të FIFA-s, Gianni Infantino, publikimin e gjithë materialit lidhur me planin e braktisur për shitjen e aksioneve të Botërorit te investitorë privatë dhe dokumentet që kanë lidhje me çështjen e sulmuesit amerikan Folarin Balogun. Kërkesa u dërgua në një letër nga Debbie Hewitt, presidente e Federatës Angleze dhe zv/presidente e FIFA-s, drejtuar Infantinos dhe sekretarit të përgjithshëm të FIFA-s, Mattias Grafström. Hewitt kërkon që të gjitha dokumentet, komunikimet dhe materialet përkatëse t’u vihen në dispozicion anëtarëve të Këshillit të FIFA-s para mbledhjes së 15 tetorit.
Ajo kërkon gjithashtu një hetim të pavarur për projektin e quajtur FIFA Forward Enterprise, përmes të cilit FIFA synonte të shiste pjesë të të drejtave ekonomike të Botërorit te investitorë privatë, në një skemë të raportuar me vlerë rreth 15 miliardë paund. Në atë projekt raportohet të ketë qenë i përfshirë edhe Joshua Kushner, vëllai i Jared Kushner. Plani u tërhoq nga Infantino gjatë verës pas kundërshtimeve të forta, me raportime që thonë se Këshilli i FIFA-s nuk ishte konsultuar për këtë skemë.
Në letrën e saj Hewitt shpreh zhgënjimin që Infantino nuk ka komunikuar me Këshillin e FIFA-s që prej 5 gushtit, kur njoftoi tërheqjen e projektit, dhe ngre shqetësime për mënyrën e funksionimit dhe transparencën e organizatës. Një tjetër pikë e kërkesës lidhet me vendimin për pezullimin e ndalimit të Balogun për të marrë pjesë në Botëror, vendim që sipas raportimeve erdhi pas një telefonate të Donald Trump me Infantinon; Trump më pas pretendoi se kishte ndikuar në ndryshimin e vendimit. Infantino ka mohuar shkeljen e ndonjë rregulli apo ligji dhe ka mohuar ndikimin në këtë vendim.
Federata Angleze ishte ndër të parat që njoftoi tërheqjen e mbështetjes për rizgjedhjen e Infantinos në marsin e ardhshëm. UEFA ka konfirmuar se po përgatit një ankesë për “keqmenaxhim kriminal” ndaj Infantinos lidhur me projektin e dështuar dhe ka kërkuar në gjykatë publikimin e provave dhe dokumenteve përkatëse. Pascale van Damme, presidente e Federatës Belge dhe anëtare e Këshillit të FIFA-s, thotë se pyetjet e saj mbi çështjen Balogun ende nuk kanë marrë përgjigje. Ndërsa presioni ndaj Infantinos rritet, beteja për rizgjedhjen e tij për një mandat të katërt mbetet e hapur, me raportime se ai mund të ketë ende mbështetje brenda FIFA-s.
