Drejtoresha e Bankës Qendrore Europiane, Christine Lagarde, ka theksuar se emigrantët janë esencialë për zhvillimin e ekonomisë europiane, sidomos në kontekstin e sfidave aktuale si kriza e energjisë dhe inflacioni i lartë. Në një fjalim të mbajtur në Wyoming të SHBA, ajo theksoi se, ndonëse emigrantët përbëjnë vetëm 9% të fuqisë punëtore në eurozonë, ata kontribuan në gjysmën e rritjes së saj gjatë tre viteve të fundit. Pa këtë kontribut, tregu i punës do të kishte përjetuar vështirësi të mëdha dhe prodhimi ekonomik do të ishte më i ulët.
Lagarde përmendi Gjermaninë dhe Spanjën si shembuj të qartë për rolin e rëndësishëm që luajnë emigrantët. Ajo tha se pa fuqinë punëtore të huaj, ekonomia gjermane do të ishte rreth 6% më e vogël, ndërsa rimëkëmbja e Spanjës është ndihmuar shumë nga emigrantët. Sipas saj, emigracioni ndihmon gjithashtu në zbutjen e pasojave të plakjes së popullsisë dhe uljes së lindshmërisë, si dhe në balancimin e prirjes për uljen e orëve të punës, që ka lehtësuar presionin inflacionar.
Megjithatë, Lagarde e theksoi gjithashtu dimensionin politik të çështjes. Ajo evidentoi se rritja e partive të ekstremit të djathtë po ndikon në politikën e emigracionit në vende si Gjermania dhe Italia, dhe se këto zhvillime mund të kufizojnë flukset e emigrantëve në një Europë që përballet me një deficit të fuqisë punëtore.
Lagarde paralajmëroi gjithashtu se Europa nuk duhet të ndjehet rehat me situatën aktuale të tregut të punës, pasi sfidat demografike, reagimet politike dhe ndryshimet në mënyrën e të punuarit paraqesin kërcënime serioze për të ardhmen ekonomike të kontinentit. Ajo u bëri thirrje liderëve që të mendojnë seriozisht për politikën e emigracionit si një zgjidhje për problemet ekonomike dhe demografike që po përjeton Europa.
