Greqia ka hedhur një hap të rëndësishëm në projektin e kërkimit të hidrokarbureve në “Bllokun 2”, pas nënshkrimit të një kontrate që hap rrugën për shpimin e parë kërkimor në det të hapur pas më shumë se 40 vitesh. Marrëveshja u firmos mes kompanisë greke Energean dhe kompanisë suedeze Stena Drilling, e cila do të sjellë anijen e specializuar Stena DrillMAX për shpimin.
Shpimi është planifikuar të nisë në shkurt të vitit 2027, duke zgjatur rreth 60 ditë deri në prill. Energean vlerëson se zona mund të përmbajë deri në 270 miliardë metra kub gaz natyror, ekuivalente me rreth 5 miliardë fuçi nafte, me një mundësi suksesi për shpimin prej rreth 16%. Operacioni do të kryhet në një thellësi prej 4,622 metrash nën tokë dhe në ujëra me thellësi 840 metra, me një kosto të parashikuar mes 60 dhe 68 milionë eurove. Rezultatet e para pritet të bëhen të ditura më 21 prill 2027.
Ministri grek i Energjisë, Stavros Papastavrou, theksoi se Greqia kalon nga teoria në praktikë në sektorin e hidrokarbureve. Nëse konfirmohet ekzistenca e një rezerve të shfrytëzueshme tregtare, Greqia do të përfitojë avantazhe energjetike dhe gjeopolitike, do të rrisë vetë-mjaftueshmërinë energjetike dhe do të sigurojë të ardhura të konsiderueshme, me të paktën 40% të fitimeve që do të shkojnë për shtetin.
Nëse shpimi rezulton i suksesshëm, projekti do t’i kalojë ExxonMobil, e cila do të marrë përsipër zhvillimin e mëtejshëm të shpimeve. Prodhimi i gazit mund të nisë brenda 3 deri në 4 vjetësh, me një investim total që mund të kalojë 5 miliardë euro. Projekti përfshin gjithashtu HELLENiQ Energy dhe ExxonMobil, ndërsa autoritetet greke shohin mundësi bashkëpunimi me gazsjellësit TAP dhe Poseidon.
Blloku 2 ndodhet në veriperëndim të Jonit, rreth 30 kilometra në perëndim të Κοrfuzit, dhe ka një sipërfaqe prej rreth 2,400 km katrorë me thellësi uji nga 500 deri në 1,500 metra. Shpimi “Asopos-1” pritet të kryhet në vitin 2027.
