Deklaratat e zëvendëskryeministrit dhe ministrit të Jashtëm italian, Antonio Tajani, gjatë një konference shkaktuan reagime të gjera politike, nga shoqëria civile dhe nga Kisha Katolike. I pyetur se çfarë do t’i këshillonte të birit për zgjedhjen e një bashkëshortjeje, Tajani tha se, ndonëse mund të jetë mirë të martohesh me një grua joshëse, një grua e tillë mund të ketë pasur disa marrëdhënie, të ketë qenë e divorcuar dhe të ketë tendencë të tradhtojë. Ai tha se do të këshillonte të birin të zgjidhte një grua “më pak tërheqëse”, por më të besueshme, e cila do të ishte një nënë e mirë dhe do t’i qëndronte besnike martesës, “një që ndoshta vesh funde pak më të gjata se të tjerat”.
Menjëherë pas deklaratave, reagimet qenë të shumta. Në rrjetet sociale u publikuan fotografi të manipuluara të Tajanit me minifund, ndërsa deputete opozitare postuan fotografi të tyre të veshura me funde të shkurtra si formë reagimi. Deputetja e Lëvizjes Pesë Yje, Chiara Apetino, publikoi një fotografi me minifund dhe i shkroi Tajanit: “Tajani, a nuk jam një grua e besueshme? A nuk jam një nënë e mirë? Në vitin 2026 nuk duhet të dëgjojmë një ministër qeverie që na shpjegon se është më mirë të martohemi me një grua që është më pak mbresëlënëse dhe me një fund më të gjatë. Besueshmëria jonë nuk matet me centimetra pëlhure”.
Në Senatin italian, 11 senatore opozitare shfaqën minifunde në një protestë simbolike në Palazzo Madama, përfaqësuese të Partisë Demokratike, Italia Viva dhe Aleancës së të Gjelbërve dhe të Majtës. Edhe ish-kryeministri Matteo Renzi e cilësoi deklaratën si të papërshtatshme: “Nuk mund të thuash që një vajzë me një fund pak më të shkurtër nuk është një person serioz. Çfarë është kjo, shekulli i 18-të?” dhe kërkoi shkarkimin e Tajanit.
Debati hyri edhe në kornizat e Kishës Katolike; imzot Giuseppe Baturi, kreu i Konferencës së Ipeshkvijve Italianë, theksoi se “Çdo fjalë dhe çdo vështrim drejtuar një gruaje duhet të jetë plot respekt dhe admirim” dhe se respekti është veçanërisht i rëndësishëm kur flitet për gratë.
Pas reagimeve, Tajani kërkoi falje nga Nju Jorku, ku ndodhet për Asamblenë e Përgjithshme të OKB-së, duke thënë se nuk kishte pasur për qëllim të ofendonte gratë dhe se kurrë nuk e kishte bërë këtë në jetën e tij private apo publike.
