Një grabitje spektakolare tronditi Napoli kur një bandë e armatosur sulmoi një degë të Crédit Agricole në zonën e Arenella, në Piazza Medaglie d’Oro, dhe mbajti peng të paktën 25 persona, klientë dhe punonjës, për disa orë. Ngjarja nisi rreth orës 12:00, kur të paktën pesë persona të maskuar hynë me forcë në bankë; sipas dëshmitarëve, ata përdorën një makinë si “dash” për të thyer xhamin e hyrjes dhe mbanin maska që përfaqësonin aktorë të njohur amerikanë.
Një kalimtar i rastësishëm vërejti lëvizjet e dyshimta dhe lajmëroi policinë, duke aktivizuar një operacion të madh të forcave të rendit. Brenda pak minutash zona u rrethua nga karabinierët dhe zjarrfikësit. Forcat speciale ndërhynë, hapën një hyrje në bankë me ndihmën e një arieteje dhe nisi një negociatë e tensionuar me grabitësit; rreth orës 15:00, të gjithë pengjet u liruan. Gjashtë persona, mes tyre punonjës dhe klientë, morën ndihmë mjekësore për shkak të gjendjes së rënduar psikologjike.
Në vendngjarje mbërriti edhe prokurori i Napolit, Nicola Gratteri, për të ndjekur nga afër zhvillimet. Ndërkohë që forcat speciale të njësisë elitare GIS përgatiteshin të hynin në bankë, grabitësit kishin arritur të zhdukeshin. Hetimet paraprake tregojnë se autorët kishin zbrazur kasetat e sigurisë dhe më pas ishin arratisur përmes një tuneli të hapur më parë. Dyshohet se kanali i arratisjes lidhej me rrjetin e kanalizimeve, duke u mundësuar autorëve largimin në mënyrë të padukshme, ndoshta deri në zonën e metrosë.
Autoritetet italiane kanë nisur një operacion të gjerë kërkimi për kapjen e autorëve, ndërsa rasti po konsiderohet si një nga grabitjet më të sofistikuara të viteve të fundit në Itali. Ngjarja, që përmban elemente të ngjashme me skenarë filmash aksion, ka rikthyer vëmendjen te siguria bankare dhe metodat gjithnjë e më të avancuara të krimit të organizuar. Top Channel.
