Bandat e organizuara që synojnë turistët e pasur në Côte d’Azur duket se janë rikthyer në aktivitet, me autoritetet franceze që raportojnë një seri vjedhjesh të bizhuterive dhe orëve luksoze në rivierën franceze. Rasti më i fundit u regjistrua në Saint-Tropez, ku katër shtetas spanjollë u arrestuan të shtunën, pasi dyshohet se vodhën një orë me vlerë rreth 300,000 dollarë nga një turist brazilian. Vjedhja ndodhi të premten në Saint-Tropez, destinacion veror që tërheq mijëra turistë, përfshirë personazhe të famshëm dhe vizitorë me të ardhura të larta.
Sipas policisë së prefekturës Var, turisti deklaroi se ora kishte vlerën e përmendur. Pas arrestimit të të dyshuarve ora luksoze u gjet dhe iu kthye pronarit. Pas ngjarjes, katër të dyshuarit dyshohet se u larguan me një automjet, çka bëri që autoritetet të nisin menjëherë një operacion për kapjen e tyre. Sipas gazetës Nice Matin, policia zhvilloi një ndjekje në rrugët e Gjirit të Saint-Tropez; katër të dyshuarit u lokalizuan dhe u arrestuan në qytetin e Cogolin, pranë Saint-Tropez, para se të merreshin në paraburgim. Ora e vjedhur u sekuestrua dhe iu kthye turistit brazilian.
Ngjarja është pjesë e një fenomeni më të gjerë që shqetëson autoritetet franceze gjatë sezonit turistik: grupe të organizuara synojnë turistët e pasur në Côte d’Azur, duke u marrë orë dhe bizhuteri me vlerë të lartë. Sipas policisë franceze, rreth 15 orë luksoze janë vjedhur që nga fillimi i kësaj vere në zonë. Deri tani, tetë persona janë arrestuar në lidhje me katër prej këtyre rasteve, ndërsa hetimet për vjedhjet e tjera vazhdojnë.
Përballë rritjes së rasteve, autoritetet kanë forcuar praninë e tyre në zonën e Saint-Tropez. Ekipi i xhandarmërisë Gassin-Saint-Tropez është përforcuar këtë vit me një detashment nga Zyra Qendrore për Luftën Kundër Delikuencës (OCLDI). Forcat e posaçme po fokusohen në hetimin e vjedhjeve të orëve luksoze dhe në identifikimin e grupeve të organizuara që kanë kthyer turistët e pasur në objektivin kryesor gjatë sezonit veror.
