Hetimet për ekzekutimin e mafiozit grek Giorgos Moschouris kanë dalë me detaje të reja, ndërsa autoritetet greke kanë rindërtuar lëvizjet e grupit që dyshohet se organizoi atentatin në Halandri. Në qendër të hetimeve është një pajisje GPS e fshehur brenda një doreze kirurgjikale, që sipas hetuesve mund të përmbajë prova për aktivitetin e organizatës kriminale dhe për objektiva të tjerë të dyshuar. Mediave greke u bëri përshtypje mënyra e sofistikuar e fshehjes, për të mos lënë gjurmë gishtash ose materiale ADN-je.
Hetuesit vunë re metoda të përdorura për të shmangur gjurmimin: një prej të arrestuarve mbante pesë telefona celularë në “airplane mode” dhe dy routerë portativë për të shmangur lokalizimin e sinjaleve telefonike. Sipas dosjes hetimore, në biseda të përgjuara njëri prej të dyshuarve ka thënë: “Po, jam vrasës dhe hajdut, kam bërë çdo të keqe”.
Policia ka monitoruar për më shumë se një vit lëvizjet dhe komunikimet e të dyshuarve; analiza e pamjeve filmike dhe materialeve të mbledhura nga njësitë speciale çoi në identifikimin e grupit që dyshohet të ketë marrë pjesë në atentat. Rindërtimi i ngjarjes tregon se autorët hyjnë në Greqi nga jashtë dhe lëvizin me automjete “operative”, duke ndryshuar vazhdimisht veshjet dhe pamjen për të shmangur identifikimin. Një automjet u identifikua fillimisht në orën 11:41, dhe më pas u regjistrua në zona të ndryshme të Athinës, përfshirë Haidarin, Egaleon dhe Aspropirgosin.
Rreth orës 13:47 dy automjete të përdorura nga grupi u filmuan në pikën e pagesës së Metamorfosis, ku autorët paguan me cash për të shmangur gjurmët bankare. Në orën 14:00 automjetet mbërritën në Halandri, pranë klinikës private ku ndodhi ekzekutimi i të ashtuquajturit “Thamnakia”; pak minuta më vonë kamerat e sigurisë regjistruan lëvizjet pranë skenës së krimit. Hetuesit kanë rindërtuar edhe itinerarin e largimit, deri në momentin kur automjetet u dogjën dhe autorët u larguan nga vendi.
Autoritetet kanë arrestuar katër persona: dy shtetas me origjinë shqiptare, Dhionis Kokoni dhe një person me mbiemrin Jupe, dhe dy shtetas grekë, Dhimitris Aleksopoulos dhe Aleksandros Petropoulos. Hetimet vazhdojnë për të identifikuar persona të tjerë që mund të kenë ndihmuar në organizimin dhe ekzekutimin e atentatit.
