Presidenti amerikan Donald Trump ka prezantuar zyrtarisht projektin e ri të quajtur “gold card”, Karta e Artë”, një nismë që u lejon shtetasve të huaj të pasur të përfitojnë qëndrim të përhershëm në Shtetet e Bashkuara në këmbim të një investimi prej 5 milionë dollarësh. Ky projekt i cili ishte shpallur në shkurt nga Zyra Ovale e Shtëpisë së Bardhë, tashmë është bërë realitet.
Sipas Trump, kjo kartë do të jetë një alternativë më e shpejtë dhe më ekskluzive se Green Card-i tradicional, duke përshpejtuar rrugën drejt shtetësisë amerikane për ata që kanë mundësi financiare të larta.
“Ka një kartë të gjelbër, tani do të ketë një kartë të artë”, deklaroi Trump gjatë një udhëtimi me Air Force One, duke prezantuar idenë si mënyrë për të sjellë kapital të huaj në SHBA.
Qëllimi i deklaruar i presidentit amerikan është të tërheqë kapital në Shtetet e Bashkuara me çdo kusht.
Dizajni i kartës së re është ngjyrë floriri, e gdhendur me portretin e fytyrës së Donald Trump, nënshkrimin zyrtar të presidentit dhe fjalët “The Trump Card”. Pas prezantimit, manjati shpjegoi se do të dalë në shitje në javët e ardhshme: “Do të mund të shesim miliona të tilla. Edhe për oligarkët rusë, ndoshta: unë njoh disa oligarkë rusë që janë njerëz shumë të mirë”, tha presidenti.
Projekti pritet të hyjë në fuqi në javët e ardhshme, ndërsa detajet zyrtare pritet të bëhen publike së shpejti.
Por çfarë ofron “Gold Card”?
Qëndrim të përhershëm në SHBA për investitorët që paguajnë 5 milionë dollarë.
Proces më i lehtësuar drejt shtetësisë amerikane, pa ndjekur rrugën e zakonshme shumëvjeçare.
Përjashtim nga disa taksa, përfshirë ato mbi të ardhurat e fituara jashtë SHBA-së.
Sipas Sekretarit të Tregtisë, Howard Lutnick, kjo kartë do të zëvendësojë programin ekzistues EB-5, i cili aktualisht kërkon investime prej rreth 800,000 deri në 1 milion dollarë në projekte që krijojnë vende pune në SHBA.
Trump u shpreh optimist për suksesin e këtij programi, duke pretenduar se miliona karta të tilla mund të shiten, përfshirë edhe për biznesmenë dhe oligarkë ndërkombëtarë.
Nisma ka ngjallur debat, pasi shikohet si një mënyrë për të “blerë” nënshtetësinë amerikane, në një kohë kur emigrantët e zakonshëm përballen me procedura të gjata dhe të ndërlikuara. Kritikët e konsiderojnë këtë politikë si përjashtuese, që mund të hapë derën për ndikime të huaja në politikën dhe ekonominë amerikane.
Megjithatë, përkrahësit argumentojnë se nisma mund të sjellë rritje të investimeve të huaja dhe të ndihmojë ekonominë e vendit.
