Policia finalizoi operacionin e koduar “Segmenti”, duke goditur një grup të strukturuar kriminal që shiste lëndë narkotike në zona të ndryshme të Tiranës, kryesisht pranë shkollave 9-vjeçare dhe të mesme. Hetimet, të kryera me metoda speciale nga Sektori për Hetimin e Narkotikëve i DVP Tiranë në drejtimin e Prokurorisë, çuan në ekzekutimin e masave të sigurisë “Arrest në burg” për 14 shtetas dhe “Arrest në shtëpi” për 1 shtetase, si dhe në shpalljen në kërkim të 5 personave të tjerë, të dyshuar si pjesëtarë të grupit.
Masat e sigurisë “Arrest në burg” u caktuan për: G. Gj., 41 vjeç; A. H., 39 vjeç; K. M., 25 vjeç; K. K., 22 vjeç; P. K., 35 vjeç; A. M., 51 vjeç; A. C., 33 vjeç; R. Q., 31 vjeç; R. M., 32 vjeç; E. Sh., 43 vjeç; S. Z., 32 vjeç; A. H., 27 vjeç; A. C., 22 vjeç; dhe G. M., 28 vjeç. Masa “Arrest në shtëpi” iu aplikua shtetases F. Gj., 38 vjeçe. Në kërkim u shpallën M. Gj., 34 vjeç; O. N., 30 vjeç; E. A., 24 vjeç; E. S., 19 vjeç; dhe K. S., 41 vjeç, ndërsa vijon puna për lokalizimin dhe kapjen e tyre.
Gjatë kontrolleve të ushtruara u sekuestruan 220 gramë lëndë e dyshuar kokainë, pjesërisht e ndarë në doza, dhe qindra doza të dyshuara Cannabis Sativa gati për shitje. Po ashtu u sekuestruan 2 tavolina pokeri, fisha dhe çipsa të dyshuar për organizimin e lojërave të palejuara, dhe 2 300 000 lekë të rinj, si dhe ambiente të përshtatura për organizimin e lojërave të fatit. Gjatë operacionit u arrestua në flagrancë A. M., 22 vjeç, në të cilin iu gjet një armë zjarri pistoletë me municion.
Nga hetimet e deritanishme, është dokumentuar me prova ligjore se pjesëtarët e këtij grupi, në bashkëpunim me njëri-tjetrin, shkëmbenin lëndë narkotike në zona të ndryshme të qytetit, sidomos pranë shkollave. Operacioni “Segmenti” është rezultat i një hetimi të gjatë; më herët janë finalizuar edhe disa operacione të tjera policore që çuan në arrestimin e 7 shtetasve të përfshirë dhe sekuestrimin e sasive të konsiderueshme të narkotikëve. Materialet procedurale i kaluan Prokurorisë për veprime të mëtejshme.
