Pas katër muaj hetime u finalizua operacioni policor i koduar “Shkolla të pastra”, i zhvilluar nga Sektori për Hetimin e Narkotikëve në DVP Tiranë në bashkëpunim me Prokurorinë e Tiranës. Nga hetimet janë identifikuar 52 shtetas, pjesëtarë të grupeve që shpërndanin lëndë narkotike pranë shkollave 9-vjeçare dhe të mesme dhe në zona të ndryshme të kryeqytetit. Për pjesëtarët e këtyre grupeve janë ekzekutuar 31 masa sigurie “Arrest në burg”. Gjatë periudhës hetimore janë arrestuar 7 persona, ndërsa 14 të tjerë janë shpallur në kërkim dhe vijon puna për kapjen e tyre.
Policia njofton se gjatë hetimeve dhe ekzekutimit të masave janë sekuestruar: 1 kg e 75 gramë heroinë, 1 kg e 265 gramë kokainë, 685 gramë Cannabis Sativa, një armë zjarri pistoletë, 90 fishekë, 2 peshore elektronike, 12 automjete, 35 telefona celularë dhe sende të tjera të kundërligjshme. Materialet procedurale i janë referuar Prokurorisë së Tiranës për veprime të mëtejshme.
Në komunikatën zyrtare përmenden emrat dhe moshat e 31 shtetasve për të cilët u ekzekutuan masat “Arrest në burg”. Gjithashtu bëhet e ditur se gjatë fazës hetimore janë ndaluar edhe shtetasit e tjerë të përmendur në njoftim, ndërsa 14 të identifikuarit mbeten në kërkim dhe të dhënat e tyre nuk bëhen publike për shkak të vijimit të hetimit.
Hetimet dokumentuan gjithashtu mënyra të shpërndarjes së lëndëve narkotike që synonin shmangien e vëmendjes së policisë së terrenit, duke përfshirë përdorimin e monopatinave, shërbimeve taxi dhe delivery për transportin e drogës. Policia e Tiranës thekson se është e angazhuar në garantimin e sigurisë në shkolla dhe në luftën ndaj fenomeneve kriminale, duke siguruar se do të intensifikojë kontrollet dhe hetimet për parandalimin dhe goditjen e veprimtarive që cenojnë sigurinë e nxënësve.
