Gjykata Speciale në Hagë do ta shpallë më 16 shtator aktgjykimin në rastin ndaj ish-krerëve të Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi. Megjithatë, edhe në rast se Thaçi shpallet i pafajshëm për akuzat për krime lufte dhe krime kundër njerëzimit, një shpallje e tillë nuk do të thotë domosdoshmërisht lirimin e menjëhershëm nga paraburgimi, sepse ndaj tij po zhvillohet paralelisht një proces tjetër në Hagë, për akuzat e pengimit të drejtësisë.
Sipas Rregullores së Procedurës dhe Provave të Dhomave të Specializuara, një i akuzuar i paraburgosur që shpallet i pafajshëm lirohet menjëherë, përveç nëse mbahet ligjërisht në paraburgim për një çështje tjetër ose është duke vuajtur dënim për vepra të tjera penale. Në rastin konkret të Thaçit, çështja nëse paraburgimi do të vazhdojë pas një eventuale pafajësie në rastin kryesor do t’i takojë gjyqtarit të vetëm që po shqyrton procesin për pengim të drejtësisë.
Zëdhënësi i Dhomave të Specializuara, Michael Doyle, ka deklaruar për Radion Evropa e Lirë se paraburgimi i Thaçit është urdhëruar në të dyja proceset. Ai ka sqaruar se, nëse Thaçi shpallet i pafajshëm në procesin për krime lufte dhe krime kundër njerëzimit, vendimi nëse ai do të vazhdojë të mbahet në paraburgim do të merret nga gjyqtari i vetëm që heton çështjen për pengim të drejtësisë.
Gjyqtari ka marrë tashmë vendimin e dhjetë me radhë për vazhdimin e paraburgimit, më 31 korrik, duke vlerësuar se ende ekziston rreziku që Thaçi të pengojë procedurat ose të kryejë vepra të tjera penale. Për procedurat e ardhshme procesuale janë caktuar afate: Thaçi mund të paraqesë parashtresat e tij për këtë çështje deri më 7 shtator; nëse nuk e bën, Prokuroria duhet të dorëzojë qëndrimin e saj deri më 14 shtator; dhe Thaçi mund të përgjigjet ndaj kësaj deri më 21 shtator.
Top Channel
