Gjykata e Tiranës ka shpallur të pafajshëm Aurel Boriçin nga të gjitha akuzat lidhur me prishjen e një pallati pas tërmetit në zonën e Kombinatit. Vendimi u njoftua të premten nga dhoma penale, ku raporton gazetarja e Top Channel, Anila Hoxha. Boriçi, aktualisht drejtor në Drejtorinë e Medias dhe Komunikimit në Bashki dhe ish-drejtor i Emergjencave Civile, ishte akuzuar për abuzim me detyrën për vendimin e prishjes pa miratim të Këshillit Bashkiak. Sipas gjykatës, provat dhe procesi treguan se vendimi për prishje ishte marrë pas analizave dhe konstatimeve të Institutit të Ndërtimit (IN) dhe pas një oponence teknike.
Gjykata gjithashtu shpalli të pafajshëm ish-zyrtarët e tjerë të bashkisë, Aurel Çuko dhe Eleana Guçe. Në arsyetimin e saj u theksua se zyrtarët kishin zbatuar aktin normativ që parashikon prishjen e ndërtesave të dëmtuara nga tërmeti kur rindërtimi tejkalon 70% të kostos ose kur IN konstaton se banesa është e pabanueshme. Sipas vendimit, veprimet e Boriçit dhe Çukos ishin në përputhje me ligjin, ndërsa Prokuroria kishte ngritur dyshime të tjera që gjykata konsideroi të pamjaftueshme.
Në të njëjtën çështje, dy ish-zyrtarë të Inspektoriatit të Mbrojtjes së Territorit (IMT), Sokol Qehajaj dhe Rexhina Rakipi, u shpallën po ashtu të pafajshëm. Ndërsa dy persona të tjerë morën dënime: Shyqyri Maloku u dënua me 9 muaj burg për falsifikim, dhe Aleksandra Mahmutllari me 6 muaj burg, që gjykata vendosi ta konvertojë në “punë në interes publik”.
Gjykata vuri në dukje se Prokuroria dështoi të provonte akuzat ndaj Boriçit dhe Çukos dhe, sipas saj, nuk respektoi disa nga vendimet hetuese për të cilat ishte urdhëruar më parë. Çështja kishte qenë pushuar më parë, me arsyetimin se nuk ekzistonte vepra penale, çka u përmend në argumentimin e gjykatës gjatë shpalljes së vendimit.
