Gjykata Kushtetuese ka publikuar kalendarin e seancave për disa çështje që do të shqyrtohen në shtator dhe tetor, njofton Anila Hoxha. Në fokus janë kërkesat për verifikimin e zgjedhshmërisë së Avokatit të Popullit dhe apelimet lidhur me masën e sigurisë ndaj kreut të Partisë Demokratike, Sali Berisha.
Më 29 shtator 2026, në orën 10:00, do të zhvillohet seanca plenare mbi bazë dokumentesh për shqyrtimin e kërkesës që synon verifikimin e zgjedhshmërisë dhe pajtueshmërisë kushtetuese të zgjedhjes së Endri Shabanit në detyrën e Avokatit të Popullit. Në të njëjtën çështje do të shqyrtohet edhe kërkesa për shfuqizimin dhe pezullimin e vendimit të Kuvendit që miratoi zgjedhjen e tij.
Po më 29 shtator, në orën 11:00, Gjykata Kushtetuese do të shqyrtojë kërkesën e Ervin Salianjit. Ai kundërshton vendimet e Gjykatës së Lartë, Gjykatës së Apelit të Juridiksionit të Përgjithshëm dhe Gjykatës së Rrethit Gjyqësor Tiranë, duke kërkuar shfuqizimin e tyre me argumentin se bien ndesh me Kushtetutën e Republikës së Shqipërisë.
Më 8 tetor 2026, në orën 11:00, Kushtetuesja do të zhvillojë seancën plenare për shqyrtimin e kërkesës së Sali Berishës. Berisha kërkon shfuqizimin e vendimeve të Gjykatës së Posaçme të Apelit për Korrupsionin dhe Krimin e Organizuar si dhe të Kolegjit Penal të Gjykatës së Lartë. Kreu i Partisë Demokratike pretendon se këto vendime janë në kundërshtim me Kushtetutën dhe kërkon heqjen e masës së sigurisë “detyrim për paraqitje”, e cila aktualisht është në fuqi ndaj tij.
Të tre rastet do të shqyrtohen në seanca plenare mbi bazë të dokumentacionit të administruar nga Gjykata Kushtetuese. Top Channel njofton se ky është kalendari i publikuar zyrtarisht për çështjet që do të trajtohen në muajt shtator dhe tetor.
