Një gjykatë apeli në Shtetet e Bashkuara ka rrëzuar kërkesën e administratës së Donald Trump për të bllokuar përkohësisht numërimin e më shumë se 20,000 fletëvotimeve me postë në Kaliforni, pas pretendimit të qeverisë se disa prej votuesve mund të mos jenë shtetas amerikanë. Vendimi është marrë nga Gjykata e Apelit e Qarkut të 9-të, me seli në San Francisko, dhe është i dyti brenda javës kundër kërkesave urgjente të Departamentit të Drejtësisë lidhur me çështjen.
Administrata Trump kishte argumentuar se në zgjedhje mund të përfshihen persona pa shtetësi amerikane, ndërsa, sipas të dhënave të përmendura, raste të tilla janë jashtëzakonisht të rralla. Gjykata vendosi me shumicë votash 2 me 1 që kërkesa e qeverisë nuk duhej të miratohej. Dy gjyqtarët që formuan shumicën, Mark Bennett dhe Gabriel Sanchez, vlerësuan se lista e përdorur nga administrata për të identifikuar votuesit që dyshohet se nuk janë shtetas mund të mos jetë plotësisht e besueshme.
Në arsyetimin e tyre, gjyqtarët paralajmëruan se pranimi i kërkesës së qeverisë mund të çonte në shkelje të të drejtave civile për një numër të madh qytetarësh. Në vendim thuhet: “Ekziston një rrezik i konsiderueshëm që miratimi i kërkesës së SHBA-së (të qeverisë) do të çojë në privimin e të drejtave civile” për mijëra njerëz. Mark Bennett ishte emëruar nga Trump, ndërsa Gabriel Sanchez ishte emëruar nga ish-presidenti Joe Biden, siç theksohet në vendim.
Kjo çështje vjen në një kohë të rëndësishme politike për Shtetet e Bashkuara, ndërsa republikanët e Donald Trump po përpiqen të ruajnë shumicën në Kongres në zgjedhjet e mesit të mandatit. Ndërkohë procesi i votimit të hershëm ka shënuar pjesëmarrje rekord, me rreth 48 milionë amerikanë që kanë hedhur tashmë votën e tyre.
