Avokatët e disa prej protestuesve dhanë deklarata pasi u vendosën masat për 19 të arrestuarit e ditës së parë të protestës. Avokati Marash Logu tha se për të pandehurit nuk kishte prova që kishin kryer veprimtari të paligjshme, dhe sipas tij e vetmja provë e paraqitur nga prokuroria ishte pjesëmarrja në protestë, gjë që nuk përbën vepër penale dhe nuk mjafton për arrestim apo për caktimin e masave. Ai njoftoi se avokatia kishte asistuar 19 protestuesit e arrestuar më 13 dhe 14 tetor. Për këta u caktuan masa: një arrest në burg, gjashtë arrest shtëpie dhe dymbëdhjetë detyrim për t’u paraqitur. Shtoi se shtatë prej protestuesve kishin shenja të rënda dhune dhe se Klevis Meta ndodhet në Spitalin e Traumës, duke theksuar se ishte ushtruar dhunë gjatë ndalimit, shoqërimit dhe mbërritjes në komisariat. Avokati theksoi se disa protestues deklaruan se do të paraqesin kallëzim penal ndaj punonjësve të policisë që i kanë dhunuar.
Avokatja Adriana Kalaja tha se personat që dolën para gjykatës ishin kryesisht studentë dhe se ata kishin paraqitur prova për dhunë nga policia. Ajo përmendi rastet e Klevis Metës dhe Xhejson Patokut, një student ekselent i fizikës, i cili sipas saj dëshmoi në gjykatë dhe dispononte prova për dhunë ekstreme, përfshirë shkelmat, me shenja evidente në fytyrë. Kalaja shprehu keqardhje që Gjykata e Tiranës, sipas saj, nuk veproi në lartësinë e detyrës, por vulosi kërkesat e prokurorisë.
Një ditë pas protestës Kalaja depozitoi në SPAK një kallëzim penal për dhunën e ushtruar, duke përfshirë emra të ndryshëm zyrtarësh: ministrin e Brendshëm, drejtorin e Përgjithshëm të Policisë, drejtorin e Policisë së Tiranës, shefat e komisariateve 1, 2, 3, 4 dhe 6, drejtorin e Mbikëqyrjes Policore dhe persona të tjerë. Ajo njoftoi po ashtu një kallëzim të ri shtesë për veprime dhune të kryera nga 14 tetori e deri më sot, duke thënë se ka prova të mjaftueshme, dhe denoncoi arrestime të dhunshme, ndalime minorësh dhe veprime arbitrare gjatë marrjes në pyetje. Sipas Kalajt, ndaj Abdullah Thaçit u gjetën disa karta banke dhe për këtë arsye u la në burg; për gjashtë të tjerë pretendohen reagime të dhunshme gjatë shoqërimit, ndërsa shumica deklaruan se kishin ndërhyrë pasi panë policinë të ushtronte dhunë ekstreme ndaj studentëve, përfshirë vajza gjimnaziste. Burimi: Top Channel.
