Partia “Bashkimi Liberal Demokrat” (BLD), e drejtuar nga Arjan Starova, i ka dërguar një kërkesë Komisionit Qendror të Zgjedhjeve pas ndëshkimit me gjobë për vonesën në dorëzimin e raportit financiar për zgjedhjet e 11 majit. Starova thekson se në zgjedhje ka garuar si pjesë e koalicionit “Aleanca për Shqipërinë Madhështore” dhe argumenton se përgjegjësia për dorëzimin e raportit nuk i takon partisë individuale, por vetë subjektit zgjedhor që mori pjesë në garë.
Në ankesë BLD sqaron se çdo veprim gjatë fushatës është ndërmarrë nga koalicioni dhe jo nga partitë pjesëmarrëse në mënyrë të ndarë. Dokumenti citon se “Bashkimi Liberal Demokrat u regjistrua fillimisht si subjekt zgjedhor. Megjithatë, me regjistrimin e Koalicionit ‘Partia Demokratike – Aleanca për Shqipërinë Madhështore’, subjekti zgjedhor që mori pjesë në zgjedhjet e datës 11 Maj 2025 ishte koalicioni. Për rrjedhojë, detyrimi për paraqitjen e raportit financiar i takon subjektit zgjedhor pjesëmarrës në zgjedhje, pra koalicionit, dhe jo partive përbëresë individualisht.” Ankesa nënvizon gjithashtu interpretimin e nenit 92/3, pika 1, sipas të cilit përdoret termi “subjektet zgjedhore” dhe jo “partitë politike”, dhe pretason se nëse ligjvënësi do të kishte dashur që raportet të paraqiteshin nga çdo parti veç e veç, kjo do të ishte përcaktuar shprehimisht.
Starova kundërshton gjobën prej 2 milionë lekësh të rinj dhe tërheq vëmendjen mbi marrëveshjen të nënshkruar me Partinë Demokratike për bashkimin në koalicion. Në ankesë thuhet se kjo marrëveshje “fiton një rëndësi të veçantë juridike, pasi përcakton të drejtat dhe detyrimet reciproke të partive, mënyrën e bashkëpunimit, ndarjen e përgjegjësive dhe mekanizmat për zgjidhjen e mosmarrëveshjeve.”
Vendimi për gjobë ndaj BLD është marrë nga kryetari i Komisionit Qendror të Zgjedhjeve, Ilirjan Celibashi, i cili së bashku me këtë parti ka ndëshkuar edhe 12 parti të tjera për mos-përmbushjen e detyrimeve lidhur me pasqyrimin financiar për zgjedhjet e 11 majit 2025. Lajmi është bërë publik nga Top Channel.
