Gjiganti amerikan i naftës Chevron njoftoi zgjerimin e aktivitetit në Venezuelë përmes investimeve të reja në fushat e Orinocos, me synim rritjen e prodhimit. Kompania Petroindependencia, në të cilën Chevron zotëron 49%, planifikon të investojë më shumë se 7 miliardë dollarë gjatë pesë viteve të ardhshme, me objektiv prodhimin e rreth 600 mijë fuçive naftë në ditë. Mike Wirth, drejtori ekzekutiv i Chevron, sqaroi se shuma përfshin një paketë të plotë që do të shpërndahet mes tre sipërmarrjeve të përbashkëta të kompanisë në Venezuelë, të cilat janë aktive në prodhimin e naftës.
Chevron tha se ka arritur marrëveshje me autoritetet venezueliane për tri subjekte, duke i hapur rrugë investimeve të ardhshme, zhvillimit të projekteve dhe rritjes së prodhimit. Wirth theksoi se historia e kompanisë në Venezuelë daton më shumë se një shekull dhe zgjerimi i pozicioneve tregon besimin e Chevron në potencialin e burimeve të vendit. Prodhimi i Chevron në Venezuelë është rritur gjatë këtij viti: në janar kompania prodhonte mesatarisht rreth 240 mijë fuçi në ditë, ndërsa deri në korrik kjo shkoi rreth 270 mijë fuçi, një rritje prej rreth 15% që nga fillimi i vitit. Wirth shtoi se një rritje prej rreth 300 mijë fuçish në ditë brenda pak vitesh do të përbënte një normë të konsiderueshme rritjeje për industrinë.
Zgjerimi i aktiviteteve vjen ndërsa Venezuela përpiqet të rikthejë prodhimin e saj të naftës; vendi zotëron rezervat më të mëdha të naftës në botë, të vlerësuara në më shumë se 300 miliardë fuçi, por prodhimi aktual është rreth 1.2 milion fuçi në ditë, shumë më poshtë se niveli maksimal prej mbi 3 milionë fuçish në ditë.
Në të njëjtën kohë, kompania italiane Eni njoftoi një marrëveshje që e bën atë operator të fushës Junin 5; drejtori ekzekutiv Claudio Descalzi vuri në dukje se nënshkrimi është hapi i parë drejt më shumë zhvillimit. Sekretari amerikan i Energjisë, Chris Wright, i pranishëm në Karakas për takime, tha se do të shpallen marrëveshje të tjera dhe se prodhimi i Venezuelës pritet të kalojë 2 milionë fuçi në ditë deri në fund të kësaj dekade.
Zhvillimet pasojnë ndryshime në politikën amerikane: embargoja ndaj naftës së Venezuelës, vendosur në 2019, u lehtësua në 2023 përmes licencave, por administrata Trump revokoi disa nga ato në gjysmën e parë të vitit 2025, përpara se Chevron të mori një përjashtim që i mundësoi kryesisht ruajtjen e aktiviteteve dhe objekteve. Wirth tha gjithashtu se marrëveshjet e reja u mundësuan nga garancitë e dhëna investitorëve nga autoritetet venezueliane dhe përmirësimet në kushtet kontraktuale e financiare.
