Kancelari gjerman Friedrich Merz dhe presidenti francez Emmanuel Macron përcollën një mesazh bashkëpunimi dhe uniteti në fushën e mbrojtjes dhe sigurisë gjatë takimit të përbashkët të Këshillit të Mbrojtjes dhe Sigurisë në bazën ajrore Nörvenich, pranë Këlnit. Merz njoftoi se Gjermania, për herë të parë, do të marrë pjesë që këtë vit në një stërvitje bërthamore të forcave të armatosura franceze, duke theksuar se “Gjermania dhe Franca po thellojnë bashkëpunimin e tyre në mbrojtje. Ne po forcojmë parandalimin evropian.”
Takimi vjen rreth një muaj pas dështimit të projektit të përbashkët të avionit luftarak SCAF, i bllokuar nga mosmarrëveshjet industriale mes kompanive Airbus dhe Dassault. Në deklaratën e përbashkët, dy liderët e përshkruan mbledhjen si “hapin e parë operacional” të një faze të re bashkëpunimi dhe riafirmuan angazhimin për të përmirësuar partneritetin franko-gjerman në fushën e mbrojtjes.
Pas dështimit të SCAF, Franca dhe Gjermania ranë dakord të punojnë për krijimin e një standardi të përbashkët që garanton ndërveprimin mes sistemeve të luftimit ajror, nga dronët deri te avionët luftarakë. Macron tha se Parisi dhe Berlini kanë “nxjerrë mësime” nga dështimi i projektit dhe se tani do të përqendrohen në iniciativa më të targetuara; ai gjithashtu theksoi se suksesi i këtyre nismave kërkon bashkëpunim të ngushtë mes udhëheqjes politike dhe industrisë së mbrojtjes.
Për të nënvizuar marrëdhëniet e ngushta mes tyre, të dy zhvilluan një mbledhje të përbashkët të Këshillit të Mbrojtjes dhe Sigurisë dhe shpërndanë mesazhe në rrjetet sociale. Merz publikoi fotografi nga takimi, përfshirë një imazh ku shfaqen duke biseduar në një avion, dhe shkroi: “Faleminderit për miqësinë tënde, Emmanuel Macron.” Në reagimet online, Macron po ashtu u shpreh mbi synimin për të forcuar konkurrencën, sigurinë, mbrojtjen dhe reziliencën e demokracive në kuadër të bashkëpunimit franko-gjerman.
