Kombëtarja e Gjermanisë fitoi 2-1 ndaj Shteteve të Bashkuara në miqësoren e zhvilluar në “Soldier Field” të Çikagos, në përballjen e fundit për të dy skuadrat para fillimit të Kupës së Botës. Gjermanët kaluan në avantazh shumë herët, në minutën e dytë, kur pas një goditjeje dënimi të ekzekutuar nga Joshua Kimmich, sulmuesi Kai Havertz shfrytëzoi një moment pasigurie të portierit amerikan dhe shënoi me kokë për 1-0.
Amerikanët reaguan dhe arritën të barazojnë para pushimit; në fund të pjesës së parë mbrojtësi Antonee Robinson realizoi një supergol nga rreth 23 metra, duke mposhtur portierin gjerman dhe vendosur rezultatin 1-1. Pas rikthimit në fushë trajneri Mauricio Pochettino nuk bëri ndryshime në formacion, por ishte sërish Gjermania që gjeti rrugën e rrjetës. Një aksion i ndërtuar mirë la të lirë Leroy Sanén, i cili finalizoi me një goditje të menjëhershme për të dërguar topin në rrjetë dhe për t’i dhënë epërsinë 2-1 skuadrës së tij.
Pavarësisht përpjekjeve të amerikanëve në minutat e mbetura të ndeshjes, rezultati nuk ndryshoi dhe Gjermania arriti një fitore morale para nisjes së Botërorit. Takimin e ndoqën 63.636 tifozë në “Soldier Field”, stadium historik që pati mikpritur edhe sfidën hapëse të Kupës së Botës 1994.
Pas kësaj ndeshjeje, Shtetet e Bashkuara do të përqendrohen te debutimi në Grupin D të Kupës së Botës kundër Paraguait më 13 qershor, ndërsa më pas do të ndeshen me Australi dhe Turqi. Nga ana tjetër, Gjermania do të nisë aventurën në Grupin E ndaj Curaçao më 14 qershor, përpara dueleve me Ekuadorin dhe Bregun e Fildishtë.
Fitorja ndaj SHBA-së i jep besim skuadrës gjermane, e cila synon të lërë pas zhgënjimet e dy Botërorëve të fundit, ku nuk arriti të kalojë fazën e grupeve.
