Policia greke ka zbuluar një plantacion tjetër droge pranë kufirit greko-shqiptar, në një zonë pyjore të Parakalamos, në Komunën e Pogonit. Operacioni u realizua nga oficerët e Departamentit të Narkotikëve të Nëndrejtorisë së Hetimit dhe Ndjekjes Penale të Krimit të Janinës, si pjesë e hetimeve operative të policisë greke, të cilat synojnë identifikimin e zonave të përshtatshme për kultivimin e bimëve narkotike.
Plantacioni ishte fshehur me kujdes nën bimësi, dhe gjatë operacionit, janë gjetur dhe sekuestruar 120 fidanë marijuanë me lartësi nga 10 deri në 50 centimetra. Pas gjetjes së plantacionit, policia ka nisur hetimet për identifikimin dhe arrestimin e autorëve. Çështja aktualisht i është caktuar Njësisë Kundër Drogës në Janinë, e cila po analizohen të gjitha informacionet përkatëse për të zbuluar individët përgjegjës për kultivimin dhe mbajtjen e plantacionit.
Hetimet vazhdojnë me intensitet, në një përpjekje për të luftuar kultivimin e paligjshëm të drogës në këtë zonë, që është e njohur për aktivitete të ndryshme të lidhura me narkotikët.
