Donald Trump njoftoi një moment historik në Sharm El Sheik lidhur me marrëveshjen për Gazën, duke theksuar se kjo mund të jetë ndoshta ajo më e rëndësishmja që ka negociuar gjatë gjithë karrierës së tij. Ai tha se, falë përpjekjeve të ekipit të tij dhe ndihmës së Katarit, Turqisë dhe Egjiptit, arritën të realizojnë një armëpushim dhe një marrëveshje shkëmbimi pengjesh me Hamasin.
Roli i Trumpit konsiderohet kyç, veçanërisht për insistimin që kryeministri izraelit, Benjamin Netanyahu, të pranojë kushte që më parë i kishte refuzuar. Megjithatë, ekspertët paralajmërojnë se marrëveshja e Gazës nuk garanton paqe të qëndrueshme në rajon, pasi armëpushimet zakonisht shkelin shumë shpejt.
Për të siguruar që kjo marrëveshje të funksionojë, të dy palët duhet të angazhohen plotësisht, por aktualisht mungon një bazë solide për armëpushimin. Një shembull i kësaj është se krizat e para ndodhën vetëm 24 orë pas njoftimit të gëzimit për lirimin e pengjeve dhe të burgosurve.
Hamas, deri më tani, ka kthyer vetëm shtatë nga 28 trupat e pengjeve të vrarë, duke u përballur me vështirësi në gjetjen e tyre mes rrënojave të Gaza. Ndërkohë, durimi i Izraelit po shteron. Simon Engelkes, drejtori i fondacionit gjerman Konrad-Adenauer në Ramallah, thekson se pretendimi për çarmatimin e Hamasit është i vështirë, pasi grupi e konsideron armatimin si një garanci për ekzistencën e tij.
Pa një kompensim politik të qartë, Hamasit do t’i jetë e vështirë të pranojë çarmatimin. Garancitë e sigurisë qoftë nga administrata Trump, qoftë nga ndihmat e tjera ndërkombëtare, nuk duken mjaft për të siguruar që lufta të mos ripërsëritet në Gaza pas kësaj marrëveshjeje armëpushimi. Sipas ekspertëve, rruga drejt një paqeje të qëndrueshme mbetet e pasigurt dhe e vështirë për t’u arritur.
