Mbetje njerëzore që i përkasin një burri, identiteti i të cilit ende nuk është përcaktuar, u gjetën në disa çanta shpine në lumin Rajn, në kantonin zviceran të Aargaut, pranë kufirit me Gjermaninë. Policia dyshon se mund të jetë fjala për një krim të dhunshëm. Ngjarja u zbulua mëngjesin e së hënës, kur tre burra që ndodheshin në brigjet e lumit, në zonën e Stein, vënë re një çantë shpine në ujë; pas nxjerrjes së saj ata gjetën brenda një këmbë njeriu dhe njoftuan autoritetet.
Pas sinjalizimit, policia kantonale dhe shërbimet e tjera nisën kërkime në zonë me ndihmën e një varke dhe zhytësve. Gjatë operacionit u gjetën edhe çanta të tjera shpine që përmbanin mbetje njerëzore, të cilat, sipas autoriteteve, i përkasin të njëjtit burrë. Shërbimi mjeko-ligjor i kantonit të Aargaut po kryen ekzaminimet e nevojshme për të përcaktuar identitetin e viktimës dhe rrethanat e vdekjes.
Policia bëri të ditur se, bazuar në gjetjet paraprake, gjithçka tregon se burri mund të ketë qenë viktimë e një krimi të dhunshëm, por deri më tani autoritetet nuk kanë dhënë detaje për vendin ku mund të ketë ndodhur krimi, rrethanat e sakta të ngjarjes apo identitetin e një autori të mundshëm. Prokuroria ka hapur një hetim penal për të zbardhur ngjarjen dhe për të përcaktuar përgjegjësitë.
Autoritetet bëjnë thirrje që qytetarët të japin çdo informacion që mund të ndihmojë hetimet, veçanërisht nëse kanë vënë re lëvizje ose aktivitete të dyshimta pranë brigjeve të lumit Rajn apo në zona të tjera. Hetimet vijojnë ndërsa mjeko-ligjorët punojnë për saktësimin e identitetit dhe shkakut të vdekjes, dhe policia vazhdon mbledhjen e provave dhe dëshmive në terren. Burimi i informacionit: Top Channel.
