Një 60-vjeçar gjerman është arrestuar pas një operacioni policor që zgjati më shumë se 12 orë në Bavari, i dyshuar për vrasjen e dy zyrtarëve të administratës lokale gjatë një kontrolli për armët në banesën e tij. Ngjarja ndodhi të enjten pasdite, më 8 tetor, në Berngau, kur dy punonjës të administratës rajonale të Neumarkt vizituan shtëpinë për të verifikuar nëse armët ruheshin dhe mbaheshin në mënyrë të ligjshme. Sipas policisë, 60-vjeçari hapi zjarr ndaj të dyshuarve, duke i vrarë të dy, dhe më pas u mbyll brenda banesës.
Fillimisht autoritetet raportuan se një burrë kishte humbur jetën dhe një grua ishte plagosur rëndë, por më vonë konfirmuan vdekjen e dy punonjësve. Pas disa orësh negociatash, forcat speciale ndërhynë rreth orës 02:20 të mëngjesit të së premtes dhe bënë të mundur arrestimin e të dyshuarit. Në operacion morën pjesë rreth 150 efektivë policie dhe 90 pjesëtarë të shërbimeve të shpëtimit dhe mbështetjes, ndërsa në zonë u angazhua edhe një helikopter policie.
Gjatë ndërhyrjes, policia u përpoq ta bindte të dyshuarin të dorëzohej paqësisht dhe deklaroi se ishte në komunikim me të, me qëllim shmangien e një ndërhyrjeje me dhunë. Motivet e sulmit mbeten të paqarta. Mediat gjermane raportuan se i dyshuari mund të ketë qenë një snajper amator dhe se nuk kishte precedentë penalë, por ky informacion nuk është konfirmuar zyrtarisht nga autoritetet.
Policia rrethoi zonën gjatë operacionit dhe bëri me dije se nuk kishte rrezik për banorët jashtë perimetrit të sigurisë. Hetimet po vazhdojnë për të zbardhur rrethanat e plota të ngjarjes dhe për të përcaktuar motivet dhe detajet e mëtejshme. Berngau përshkruhet si një komunitet rural me rreth 2,600 banorë, në rajonin e Pfalzit të Sipërm, në Bavari.
