Kryetari i Grupit Parlamentar të Partisë Demokratike, Gazment Bardhi, ka bërë një deklaratë të fortë publike kundër Zëvendëskryeministres Belinda Balluku, duke e cilësuar atë si zyrtaren më të korruptuar të shtetit shqiptar në 35 vitet e fundit.
Në një reagim të gjatë në rrjetet sociale, Bardhi thotë se Balluku është e përfshirë në çdo aferë korruptive — nga energjia te infrastruktura, nga Tuneli i Llogarasë te Aeroporti i Vlorës — dhe se dosjet e saj në SPAK janë me dhjetëra, ndërsa një prej tyre “ka marrë rrugë”.
Bardhi ngre akuza të rënda për ndërhyrje politike ndaj drejtësisë, duke pretenduar se prokurori i posaçëm Dritan Premçi është nën presion të drejtpërdrejtë nga Kryeministri Edi Rama, nga drejtues të lartë të pushtetit, segmente mediatike dhe eksponentë të krimit të organizuar.
Deputeti demokrat ka adresuar pesë pyetje publike për SPAK-un dhe drejtuesin e tij, Altin Dumanin, ku ndër të tjera kërkon të dijë:
- Nëse është e vërtetë që Belinda Balluku është thirrur javën e ardhshme për t’u marrë në pyetje me status të pandehure;
- Nëse Kryeministri Rama ka ndërhyrë për të anuluar thirrjen;
- Dhe nëse Balluku ka “sajuar” një aktivitet ndërkombëtar për të shmangur paraqitjen në SPAK.
Bardhi kërkon që SHBA dhe BE të monitorojnë nga afër këtë rast dhe të garantojnë që prokurorët të mos ndikohen nga presionet politike apo kriminale.
“I ftoj partnerët ndërkombëtarë të mbrojnë integritetin e SPAK dhe të mbështesin çdo prokuror që nuk i nënshtrohet urdhrave të pushtetit”, përfundon Bardhi.
Statusi i plotë i z.Bardhi:
Belinda Balluku është zyrtarja më e korruptuar e shtetit shqiptar në këto 35 vite. Në çdo aferë, në çdo sektor, janë gjurmët e saj të korrupsionit, nga energjia tek infrastruktura; nga Tuneli i Llogarasë tek Aeroporti i Vlorës.
Dosjet e saj në SPAK janë me dhjetëra dhe duket se njëra prej tyre ka marrë rrugë tashmë. Kjo është arsyeja pse prej kohësh tashmë, burime të mirëinformuara, bëjnë me dije se prokurori i posaçëm z. Dritan Premçi është nën presion nga brenda SPAK, nga nivelet më të larta të pushtetit, nga segmete të caktuara mediatike apo nga eksponentë të krimit të organizuar.
Duke ndjekur nga afër këto zhvillime, me shumë shqetësim, nisur edhe nga fakti që nuk do jem prezent në seancën e të hënës në Kuvend, sot kam disa pyetje drejtuar SPAK:
1- A është e vërtetë që prokurori i posaçëm z. Dritan Prençi ka thirrur për javën që vjen, me synim komunikimin e statusit “e pandehur” Zëvendëskryeministren Belinda Balluku?
2- A është e vërtetë se për këtë shkak prokurori i posaçëm z. Dritan Premçi ka patur ndërhyrje të drejtpërdrejta nga Kryeministri Edi Rama për të anulluar thirrjen e Belinda Ballukut, duke e informuar prokurorin se ajo nuk do të paraqitet në SPAK javën e ardhshme?
3- A ka sajur Belinda Balluku një aktivitet ndërkombëtar në të njëjtën ditë dhe orë që duhet të paraqitej në SPAK, me qëllim që të justifikojë refuzimin dhe për të fituar kohë për të shtuar presionin ndaj prokurorit?
4- Pyetje direkte për Drejtuesin e SPAK z. Altin Dumani: A jeni ju në dijeni të presionit të mundshëm ndaj prokurorit të posaçëm z. Dritan Premçi dhe a jeni ju duke përmbushur rolin tuaj për të mbështetur prokurorin?
5- Cili autoritet brenda SPAK po përpiqet të bëjë kozmetikën mediatike në mbrojtje të Belinda Ballukut dhe për çfarë arsyeje?
Në përfundim duke qenë besimplotë se partnerët tanë ndërkombëtarë, veçanërisht SHBA dhe BE, kanë interes të shtuar në mbrojtjen e integritetit të SPAK, i ftoj publikisht të monitorojnë nga afër këtë çështje, ndërhyrjet kriminale për t’i lidhur duart prokurorisë dhe të konfirmojnë të gjithë mbështetjen e tyre ndaj prokurorit të posaçëm Dritan Premçi dhe çdo prokurori që nuk i nënshtrohet presionit politik apo kriminal mbi çështjet që kanë nën hetim.
