Venezuela është tronditur nga dy tërmete të fuqishme me magnitudë 7.2 dhe 7.5 që goditën vendin të mërkurën pasdite, duke lënë pas shkatërrim dhe humbje jetësh. Ministri i Shëndetësisë, Carlos Alvarado, njoftoi për median shtetërore se të paktën 235 persona kanë vdekur dhe 4,300 janë plagosur. “Fatkeqësisht, 235 persona që mbërritën pa shenja jetësore ose vdiqën pas mbërritjes në mjediset tona shëndetësore”, tha Alvarado. Autoritetet paralajmërojnë se numri i të vdekurve pritet të rritet, pasi më shumë se 50,000 persona janë raportuar të zhdukur.
Dëshmitarët dhe mediat raportuan imazhe apokaliptike në mëngjesin e së enjtes: ndërtesa të shndërruara në rrënoja, mobilje që vareshin nga dritaret, helikopterë që fluturonin mbi zonat e prekura, ndërsa rrugët dhe infrastrukturat kryesore u dëmtuan rëndë. Familjet po përdorin një faqe interneti për të postuar foto të të dashurve të zhdukur, ndërsa të tjerë shpërndajnë lista të shkruara me dorë për emra dhe vendndodhje gjatë përpjekjeve për gjetjen e të afërmve. Ndërprerjet e shërbimeve telefonike kanë vështirësuar kontaktet, dhe qytetarët jashtë vendit po përpiqen të lidhen me të afërmit.
Ekipet e kërkim-shpëtimit janë nisur drejt zonave të prekura dhe po punojnë nën kushte të vështira, me frikën se shumë njerëz mbeten të bllokuar nën rrënoja. Autoritetet e sigurisë dhe emergjencës vijojnë operacionet të koordinuar për shpëtimin dhe ndihmën e të prekurve.
Tërmetet janë ndër më të fuqishmet që janë regjistruar në Venezuelë në më shumë se një shekull dhe lëkundjet u ndjenë në një pjesë të gjerë të rajonit, duke shkaktuar evakuime edhe në zona të Amazonës në Brazil. Për të lehtësuar dërgimin e ndihmës humanitare dhe operacioneve të rehabilitimit, Departamenti i Thesarit i Shteteve të Bashkuara njoftoi pezullimin e përkohshëm të disa sanksioneve deri më 23 tetor, në mënyrë që transaksionet lidhur me ndihmën dhe rikuperimin të mund të kryhen.
