Galatasaray u shpall kampion i Turqisë për herë të 26 pas fitores 4-2 ndaj Antalyaspor, dhe pas këtij triumfi sulmuesi Mauro Icardi përdori rrjetet sociale për të reaguar ndaj kritikave që i janë bërë gjatë sezonit dhe më parë. Në një postim në Instagram, ku publikoi edhe një seri fotosh nga festa e titullit së bashku me të dashurën China Suarez, Icardi shkroi se gjatë katër vjetëve të fundit kishte dëgjuar shumë akuza dhe gjykime për gjendjen e tij fizike dhe performancën: “që isha i shëndoshë, i dobët. Që isha i mbaruar, i dëmtuar, jashtë forme apo që nuk isha më i njëjti lojtar.”
Icardi pranon se ndoshta disa prej kritikave mund të kenë pasur pjesërisht të drejtë, por i bëri të qarta shifrat dhe statistikat e tij si argument zyrtar: “Ndoshta kishit të drejtë, por shifrat dhe statistikat e mia flasin vetë, ju ftoj që t’i shikoni.” Ai akuzoi gjithashtu disa media dhe zëra kritikë për tentime diskreditimi, duke thënë se çdo ditë kishte një justifikim të ri, një titull të ri në media apo një “gënjeshtër të re për të shitur histori e për të tentuar që të më diskretitonin.” Sipas tij, koha vendos gjithçka në vendin e vet.
Përveç kritikave ndaj kundërshtarëve mediatikë, Icardi i dedikoi një pjesë të mesazhit tifozëve të Galatasaray, duke theksuar rëndësinë e mbështetjes së tyre gjatë periudhave të vështira: “Kur gjërat bëhen të vështira, kur presioni është i lartë dhe duhet me të vërtetë të marrësh përsipër përgjegjësitë, vetëm pak persona e kanë aftësinë të ndryshojnë historinë.” Ai falenderoi ata që vazhduan të besonin te ai, kënduan, e mbështetën dhe e mbrojtën në momentet më të vështira, dhe vlerësoi se dashuria që i është dhënë gjatë katër viteve vlen më shumë se çdo “gënjeshtër e sajuar.”
