Aksidenti hekurudhor në Toledo, që shkaktoi dhjetëra të vdekur e të plagosur, tronditi Spanjën dhe nxiti reagime të forta nga futbollistët e La Liga, të cilët i kanë drejtuar kritika të ashpra Ministrit të Transporteve, Oscar Puente. Mesazhet më të dukshme erdhën nga Marcos Llorente i Atletico Madrid, i cili në rrjetet sociale sulmoi ashpër sjelljen e ministërs dhe mënyrën si ai i qaset komunikimit publik. Postimi i Llorentes u ripostua nga kolegët Dani Carvajal dhe Thibaut Courtois, duke i dhënë më shumë përhapje reagimit.
Llorente vuri në qendër të kritikave të tij aktivizmin e Puentes në Twitter, duke i kërkuar të lërë mënjanë rrjetet sociale dhe të përqendrohet te detyra për të cilën paguhet. Ai theksoi se kur janë në mes jetë njerëzore, e vetmja gjë që mund të kërkohet nga një ministër transportesh është përgjegjësia, serioziteti, siguria dhe respekti. Futbollisti shtoi se është e papranueshme që politikanët të tregohen më të shqetësuar për të fituar debate në rrjetet sociale sesa për t’u marrë me përgjegjësitë e tyre.
Në vazhdim të mesazhit, Llorente kërkoi llogari për mungesën e shërbimeve dhe për rreziqet e lidhura me transportin, duke akuzuar Puenten se Twitter nuk është detyra e tij dhe se përgjegjësia e tij duhet të jetë sigurimi i transportit publik dhe dhënia e llogarisë kur gjërat shkojnë keq. Ai përfundoi duke e quajtur menaxhimin e situatës nga ministri “një katastrofë” në këtë pikë.
Reagimi i futbollistëve erdhi në një moment kur vendi po përballet me pasojat e një aksidenti që ka shkaktuar viktima dhe të plagosur, ndërsa deklaratat e figurave publike dhe sjellja e zyrtarëve shtetërorë në rrjetet sociale janë vënë nën lupë. Sulmet e Llorentes dhe mbështetja e ripostimeve nga Carvajal e Courtois kanë bërë që kritikat të jenë të dukshme në mediat sociale dhe të shtojnë presionin ndaj ministrit të Transporteve.
