Nisma e Federatës Shqiptare të Futbollit për ndërtimin e dy fushave moderne në Luginën e Preshevës ka marrë mbështetje nga komuniteti lokal dhe synon të krijojë kushte më të mira për fëmijët dhe të rinjtë që merren me futboll në këtë zonë. Projekti parashikon ndërtimin e një fushe në Bujanoc dhe një tjetër në Preshevë, duke adresuar një prej nevojave të vazhdueshme të komunitetit sportiv lokal: mungesën e ambienteve të përshtatshme për stërvitjen dhe zhvillimin e moshave të reja.
Në Bujanoc, kryetari i komunës, Arbër Pajaziti, e ka vlerësuar nismën dhe ka bërë thirrje që edhe bizneset dhe donatorët të kontribuojnë në realizimin e saj. Një prej tyre është biznesmeni me origjinë nga Bujanoci, Tamer Turker, i cili ka konfirmuar një kontribut financiar për projektin. “Federata e Futbollit ka marrë iniciativën për ndërtimin e dy fushave në Luginën e Preshevës, njëra në Bujanoc dhe tjetra në Preshevë. Si kryetar i komunës së Bujanocit, e përshëndes këtë iniciativë. Është një investim i drejtpërdrejtë në sport dhe në të ardhmen e fëmijëve tanë”, u shpreh Pajaziti.
Për ata që punojnë çdo ditë me moshat e reja, rëndësia e projektit lidhet kryesisht me kushtet ku stërviten fëmijët. Florim Agaj, trajner i moshave te Besa e Bujanocit, e cilësoi ndërtimin e fushës si një pritshmëri të kahershme të komunitetit. “Për ne është një nga projektet më të mëdha që mund të ndodhë në qytetin e Bujanocit. Është një ëndërr që me gjasë po bëhet realitet. Ne e kemi pritur shumë gjatë një fushë”, tha Agaj, duke falënderuar FSHF-në, Presidentin Armand Duka dhe familjen Turker për mbështetjen.
Entuziazmi është ndjerë edhe te qytetarët e Bujanocit; Mensur Avdiu tregoi se lajmi për projektin është pritur veçanërisht mirë nga fëmijët, të cilët shpresojnë të kenë së shpejti një hapësirë të re dhe më të përshtatshme për të luajtur dhe stërvitur. Nëse realizohet sipas planit, dy fushat në Bujanoc dhe Preshevë do të jenë një investim konkret në infrastrukturën sportive të Luginës dhe një hapësirë e re për brezin e ri që synon të zhvillohet përmes futbollit.
