Nga kjo e premte, vendi do të jetë nën ndikimin e masave ajrore të lagështa dhe më të freskëta, njofton Shërbimi Meteorologjik Ushtarak. Priten vranësira të herëpashershme në qendër dhe në jug, përfshirë zonat kodrinore dhe malore të kryeqytetit, ku vijojnë të jenë aktive disa vatra zjarri.
Sinoptikani Elvi Jahaj tha se vranësirat do të shoqërohen me reshje shiu me intensitet të ulët, kryesisht në relievet kodrinore dhe malore në Gjirokastër, Berat dhe Korçë. Në Korçë, reshjet do të jenë edhe në formën e shtrëngatave. Në Tiranë dhe Elbasan, reshjet do të jenë të herëpashershme dhe me intensitet të ulët. Edhe gjatë fundjavës, vendi do të mbetet nën ndikimin e masave më të freskëta dhe të lagështa, ndërsa moti i paqëndrueshëm pritet të vazhdojë.
Sinoptikanët parashikojnë se të martën reshjet e shiut do të përfshijnë të gjithë vendin, duke lënë pas valën e nxehtësisë përvëluese dhe duke rikthyer temperaturat te vlerat mesatare të muajit gusht. Sipas parashikimit, të martën pasdite reshjet do të përfshijnë të gjithë territorin dhe herë pas here do të jenë në formën e shtrëngatave. Nga vlerat 40–41 gradë Celsius në mesditë, temperaturat pritet të ulen në rreth 35–36 gradë Celsius, me rënie edhe të vlerave minimale të temperaturës.
Era, faktor që ndikon në përhapjen e flakëve në zonat e përfshira nga zjarret, pritet të ulet gjatë ditëve në vijim, duke mos tejkaluar shpejtësinë 10–12 metër për sekondë.
Top Channel
