Që nga qershori, pas nisjes së faljes me kusht dhe pa kusht të detyrimeve tatimore të papaguara, po aplikohet në të njëjtën mënyrë edhe për detyrimet doganore. Mbi 260 subjekte kanë përfituar deri tani nga falja e detyrimeve doganore të papaguara, ndërsa vlera e detyrimeve të fshira ka arritur 505 milionë lekë. Ligji krijon lehtësira për bizneset, por ekspertët fiskalë që janë në kontakt me subjekte të ndryshme vërejnë se një pjesë e tyre tregohen neglizhente në ndjekjen e procedurave të nevojshme për të përfituar nga falja.
Etleva Treska, eksperte fiskale, shpjegon se një nga keqkuptimet më të shpeshta është bindja se falja realizohet automatikisht për të gjitha rastet. Sipas saj, bizneset që kanë deklarata të padorëzuara nga periudhat e mëparshme duhet t’i plotësojnë këto detyrime procedurale, në të kundërt rrezikojnë të mos përfitojnë nga skemat lehtësuese të parashikuara në ligj. Afatet mbeten elementi kyç për përfitimin nga falja fiskale: për detyrimet e krijuara deri më 31 dhjetor 2014 parashikohet fshirja automatike; për detyrimet e periudhës 2015–2019 bizneset kanë mundësi të përfitojnë nga falja e një pjese të detyrimeve nëse respektojnë afatet e pagesës së principalit; ndërsa për detyrimet e viteve 2020–2024 mund të përfitojnë nga fshirja e gjobave dhe kamatëvonesave pas shlyerjes së plotë të detyrimit kryesor.
Ekspertët këshillojnë bizneset të verifikojnë situatën e tyre tatimore dhe doganore dhe të veprojnë brenda afateve të përcaktuara, duke vënë në dukje rëndësinë e respektimit të afateve, veçanërisht deri më 30 qershor, përndryshe do të humbasin mundësinë për të përfituar nga skemat. Degët tatimore dhe doganore do të vijojnë evidentimin e rasteve përfituese deri në fund të vitit 2026. Përtej detyrimeve të papaguara doganore, deri më tani janë fshirë pa kusht mbi 306 milionë euro detyrime tatimore. Përfituesit aktualë dhe të mundshëm udhëzohen të plotësojnë dokumentacionin dhe të kryejnë pagesat e kërkuara sipas rregullave ligjore për të mos humbur përfitimet.
