Shtetet e Bashkuara kanë zhvendosur avionë ushtarakë nga një bazë e dytë ajrore në Britaninë e Madhe, pas shqetësimeve për një kërcënim të mundshëm nga Irani, raporton “The Wall Street Journal”, duke cituar zyrtarë dhe persona të njohur me çështjen. Sipas gazetës, dy avionë cisternë amerikanë që operonin nga baza RAF Mildenhall u nisën drejt Gjermanisë të hënën në mëngjes. Më vonë gjatë ditës, edhe avionë të tjerë cisternë u zhvendosën drejt Gjermanisë dhe vendeve të tjera.
Natyra e saktë e kërcënimit ndaj RAF Mildenhall mbetet objekt diskutimi mes zyrtarëve amerikanë, sipas burimeve të gazetes. Një zëdhënës i Ministrisë britanike të Mbrojtjes tha se nuk komenton aktivitetet ushtarake të vendeve të tjera dhe theksoi se lëvizjet e avionëve dhe aseteve të tjera kryhen rregullisht në varësi të nevojave operacionale. Pentagoni dhe Komanda Evropiane e Ushtrisë Amerikane nuk iu përgjigjën menjëherë kërkesave të Reuters për koment.
Ky zhvillim vjen disa javë pasi SHBA-të larguan bombarduesit e tyre B-1 nga baza ajrore RAF Fairford, në jugperëndim të Anglisë, pas një incidenti sigurie që dyshohet se kishte lidhje me Iranin. Baza RAF Fairford kishte shërbyer si një pikë e rëndësishme operacionale për bombarduesit amerikanë, të cilët u përdorën në sulmet kundër Iranit, dhe pas incidentit të sigurisë Uashingtoni vendosi të largojë bombarduesit B-1 nga ajo bazë.
Muajin e kaluar, kryeministri britanik Andy Burnham deklaroi se aktiviteti në bazën RAF Fairford mund të kishte qenë i koordinuar me Iranin; kjo pretendim u mohua nga ambasadori iranian në Britaninë e Madhe. Zhvendosja e avionëve nga RAF Mildenhall cilësohet si zhvillimi i dytë i këtij lloji në bazat amerikane në Britani, duke shtuar shqetësimet për sigurinë e instalimeve ushtarake perëndimore në një periudhë tensionesh të larta mes Uashingtonit dhe Teheranit.
