Franca ka nisur zbatimin e masave të rrepta kundër përdorimit të drogës brenda administratës shtetërore, të arsyetuara nga kryeministri Sébastien Lecornu me nevoja sigurie. Lecornu kishte paralajmëruar disa javë më parë testime të papritura e të paparalajmëruara në ministri; tashmë raportohet për pushimet e para nga puna pasi disa punonjës ministrish rezultuan pozitivë në testet e drogës, sipas agjencisë dpa. Kryeministri konfirmoi largimet në një intervistë për revistën Paris Match, duke theksuar se shumë të testuar kanë qasje në informacione jashtëzakonisht të ndjeshme dhe prandaj përdorimi i drogës paraqet rrezik për sigurinë dhe funksionimin e shtetit.
Në mes të qershorit, Lecornu u kishte dërguar ministrive një qarkore që urdhëronte teste të detyrueshme dhe të paparalajmëruara të pështymës për zbulimin e përdorimit të drogave. U kërkua kontrolli i anëtarëve të ministrive, zyrtarëve të lartë shtetërorë dhe personelit që i nënshtrohet verifikimeve të sigurisë. Qarkorja përcaktonte se në rast të rezultatit pozitiv, autoritetet duhet të shqyrtojnë pasojat, përfshirë masa disiplinore.
Përveç mbrojtjes së informacionit shtetëror, qeveria synon të ruajë besueshmërinë e shtetit në luftën kundër kriminalitetit të lidhur me drogën. Lecornu vuri në dukje se trafiku i drogës është “sfidën më të madhe të politikës së brendshme” me të cilën përballet Franca dhe se në vend ka pothuajse një milion konsumues drogave, që prek të gjitha shtresat e shoqërisë, duke përfshirë edhe botën politike. Ai thekoi se lufta e shtetit kundër drogës mund të mbetet e besueshme vetëm nëse ata që e udhëheqin nuk lënë vetë shkak për dyshim dhe nuk aplikohen standarde të dyfishta.
Kryeministri deklaroi se testet nuk janë masë e përkohshme apo simbolike: “Testet do të kryhen në mënyrë rastësore dhe do të vazhdojnë”, dhe shtoi se pasardhësit e tij mund të shkojnë edhe më tej. Ekipet e testimit kanë qenë pa paralajmërim edhe në Hôtel de Matignon; sipas TF1, rezultatet për kryeministrin dhe bashkëpunëtorët e tij kanë qenë negative. Kjo nismë përbën pjesë të përpjekjeve më të gjera të qeverisë për të forcuar luftën kundër drogës dhe për të garantuar që zyrtarët publikë të përmbushin standardet që shteti kërkon nga qytetarët e tij.
