Policia arrestoi 4 persona dhe shpalli në kërkim 2 të tjerë si pjesë e një grupi që merrej me shitjen e armëve të zjarrit, lëndëve plasëse dhe municioneve. Operacioni, i koduar “Rjeti”, pati si rezultat sekuestrimin e 7 armëve të zjarrit dhe municionit në fazën e fundit të veprimeve.
Gjatë gjithë harkut kohor në të cilin u shtri operacioni “Rjeti”, autoritetet vendosën në pranga gjithsej 9 persona dhe sekuestruan 17 armë zjarri, 4 kallëpe lëndë plasëse, një sasi të madhe municionesh, 4 automjete dhe 13 telefona celularë. Sipas përgjegjësve të hetimit, pistoletat shiteshin deri në 1.500 euro, ndërsa armët automatike të tipit kallashnikov kapnin vlerën deri në 2.500 euro, në varësi të porosive.
Në fazën e ditës së sotme të operacionit u arrestuan Marsel Varka, Elsaed Maqinaj, Fabian Zako dhe Kristaq Biba, ndërsa në kërkim janë shpallur Kevin Vila dhe Bledar Avdillari. Më herët, në kuadër të të njëjtit operacion, ishin arrestuar Donati Jaku, Florian Gjeta, Urim Meta, Ligor Mehmet dhe Klodian Mustafa.
Hetimet vijojnë në përpjekje për identifikimin e të tjerëve të përfshirë dhe për sqarimin e rrjetit të furnizimit dhe shpërndarjes së armëve dhe lëndëve plasëse. Nga informacionet zyrtare rezulton se veprimet hetimore dhe operacionale kanë synuar goditjen e një grupi kriminal të strukturuar që ofronte për shitje armë dhe eksplozivë me çmime të ndryshme, sipas llojit të armës dhe porosisë.
Policia vijon kontrollin mbi materialet e sekuestruara dhe procedon me veprimet ligjore kundrejt të arrestuarve, ndërsa ndaj personave në kërkim po kryhen veprime për kapjen dhe procedimin e tyre.
