Në Tiranë po zhvillohet edicioni i njëmbëdhjetë i Forumit të Konektivitetit, ku përfaqësues nga rajoni dhe Europa diskutojnë për çështje të ndërlidhjes, konkurrueshmërisë dhe mbrojtjes në Europën Juglindore. Ministrja e propozuar për Europën dhe Punët e Jashtme, Elisa Spiropali, theksoi rëndësinë e mbylljes së negociatave për anëtarësim në BE deri në vitin 2027, me qëllim anëtarësimin deri në vitin 2030.
Spiropali e cilësoi hapjen e katër kapitujve të negociatave dhe 28 kapitujve të hapur përgjatë vitit të kaluar, si një arritje të rëndësishme në rrugën drejt integrimit në BE. Ajo theksoi se Shqipëria po shndërrohet në lider të bashkëpunimit rajonal, duke kontribuar në marrëveshje të rëndësishme për mobilitetin brenda CEFTA dhe RCC.
Ministrja nënvizoi projektet infrastrukturore si objekte kyçe për ndërlidhjen dhe zhvillimin e rajonit. Që nga viti 2015, Shqipëria ka investuar në infrastrukturën kombëtare dhe rajonale, duke përmirësuar transportin dhe lehtësuar kalimet kufitare. Projekte të tilla si Tuneli i Llogarasë dhe Ura e Drinit kanë përmirësuar ndjeshëm lidhjet transportuese dhe kanë rritur lidhshmërinë me tregjet.
Për më tepër, Shqipëria ka thelluar lidhjet ekonomike dhe financiare përmes fondeve të BE-së, duke e përmirësuar besueshmërinë financiare dhe duke nënshkruar marrëveshje për të eksportuar energji të rinovueshme. Integrimi në korridoret ndërlidhëse dhe krijimi i ALPEX për energjinë janë hapa kritikë drejt lidhjes me BE-në.
Një përpjekje tjetër e rëndësishme është marrëveshja rajonale e roaming, e cila ka eliminuar tarifat për shërbimet mobile, duke krijuar një zonë “roaming të lirë”. Po ashtu, Shqipëria është duke bërë përparime të dukshme në fushën digjitale, duke adoptuar legjislacionin e BE-së për internetin me brez të gjerë.
Këto zhvillime reflektohen edhe në rritjen e trafikut në Aeroportin Ndërkombëtar të Tiranës dhe përgatitjen e vendit për futur teknologjitë moderne dhe inteligjencën artificiale në shërbimet publike. Shqipëria po bëhet kështu një pike kyçe për ndërlidhje dhe zhvillim në rajon.
