Riccardo Adami nuk do të jetë më inxhinier i pistës për Lewis Hamilton, sipas një njoftimi zyrtar të skuderisë Ferrari. Ky lajm, që ka qarkulluar prej disa kohësh, u bë i njohur publikisht këtë të premte. Megjithatë, Adami do të vazhdojë të punojë me Ferrarin, duke u angazhuar në një rol tjetër brenda Akademisë së Pilotëve të kësaj skuderie.
Në komunikatën e Ferrarit, u njoftua se Adami do të jetë në pozitat e ‘Menaxherit të Akademisë së Pilotëve të Ferrarit dhe Testimit të Makinave të Mëparshme’. Në këtë rol, ai do të kontribuojë me përvojën e tij të gjerë dhe ekspertizën në Formula 1 për të mbështetur zhvillimin e talentëve të rinj dhe për forcimin e kulturës së performancës në programin e akademisë. Ferrari falenderoi Adamin për angazhimin dhe kontributin e tij si inxhinier i pistës, duke i dëshiruar gjithashtu suksese në pozitat e reja. Ndërkohë, emërimi i inxhinierit të ri të pistës për makinën me numër 44 do të bëhet i ditur në kohën e duhur.
Riccardo Adami iu bashkua Ferrari pas shkëputjes nga Toro Rosso në vitin 2015, dhe që atëherë ka mbuluar rolin e inxhinierit të pistës. Ai ka punuar me 4 herë kampionin e botës, Sebastian Vettel, dhe më pas me Carlos Sainz nga viti 2021 deri në vitin 2024. Më vonë, Adami kishte qenë i konfirmuar për të mbështetur Lewis Hamilton për sezonin e ardhshëm, një rol që tani do të mbetet vakant.
Ky transferim tregon përkushtimin e Ferrarit për të zhvilluar talente të reja dhe për të përmirësuar kulturën e ekipit, duke ruajtur vazhdimësinë në rrugën drejt suksesit në Formula 1.
