Aktivistët e flotiljes globale Sumud janë filmuar në portin izraelit të Ashdodit të gjunjëzuar, me duar të lidhura dhe të rrethuar nga agjentë të shërbimit të brendshëm Shin Bet, ndërsa ministri izraelit i Sigurisë, Itamar Ben Gvir, i përbuz publikisht. Pamjet ngjallën polemika lidhur me trajtimin e pjesëmarrësve të një misioni humanitar që u nis nga Turqia drejt Rripit të Gazës.
Autoritetet izraelite ndaluan në total 430 persona, ndër të cilët sipas raportimeve paraprake janë edhe 29 shtetas italianë. Në reagim, kryeministrja italiane Giorgia Meloni dhe ministri i Jashtëm Antonio Tajani e konsideruan “të papranueshme” mënyrën e trajtimit dhe kërkuan që Izraeli të kërkojë ndjesë për, siç thanë, mosrespektimin e kërkesave të qarta të qeverisë italiane. Ministria e Jashtme italiane thirri ambasadorin izraelit për “shpjegime formale”. Mediat raportuan gjithashtu se mes të ndaluarve ndodhet edhe një shtetas shqiptar.
Reagime të ashpra erdhën edhe nga opozita italiane, e cila përshkroi sulmin si “një ofendim ndaj dinjitetit njerëzor”. Organizatorët e Flotiljes dhe grupe pro-palestineze kanë thirrur një ditë mobilizimi, duke kërkuar lirimin e menjëhershëm të të ndaluarve dhe duke denoncuar incidentin si një “akt piraterie”.
Flotilja Sumud përshkruhet si një iniciativë me natyrë humanitare dhe politike që organizon udhëtime detare nga vende të ndryshme drejt Rripit të Gazës. Qëllimi i saj është t’i japë fund, sipas organizatorëve, bllokadës detare izraelite ndaj Gazës dhe të sjellë vëmendje ndërkombëtare mbi situatën humanitare atje.
Ngjarjet në portin e Ashdodit dhe pamjet e shpërndara ngritën debate ndërkombëtare dhe reagime diplomatike, veçanërisht nga Italia, ndërsa organizatorët e flotiljes vazhdojnë thirrjet për protesta dhe kërkesën për lirimin e të ndaluarve. Top Channel.
