Barcelona ka njoftuar se ka siguruar 105 milionë euro përmes emetimit të obligacioneve, me afat maturimi deri në tetor të vitit 2036 dhe me një normë fikse interesi prej 5.14%. Sipas klubit katalanas, operacioni tërhoqi interes të madh nga investitorët ndërkombëtarë, veçanërisht në Shtetet e Bashkuara.
Kërkesa për obligacionet ishte më shumë se dyfish i shumës së ofruar, ndërsa e gjithë emetimi u shit në më pak se dy orë. Blenësit ishin kryesisht investitorë institucionalë amerikanë, përfshirë kompani sigurimesh, fonde investimi dhe fonde pensionesh, sipas njoftimit të klubit. Barcelona vlerëson se ky rezultat reflekton besimin e tregjeve financiare ndaj projektit dhe strategjisë së saj ekonomike.
Klubi gjithashtu thekson që kostoja e financimit është përmirësuar si pasojë e perceptimit më të mirë të rrezikut nga investitorët. Të ardhurat nga emetimi do të përdoren për të forcuar likuiditetin e klubit dhe për të mbështetur zhvillimin e planit strategjik, me synimin për të garantuar rritje dhe stabilitet financiar në vitet në vijim.
Procesi i emetimit u drejtua nga banka amerikane Goldman Sachs, e cila veproi si organizatore dhe agjente e shitjes së obligacioneve. Njoftimi i Barcelonës thekson pjesëmarrjen e fuqishme të investitorëve institucionalë amerikanë dhe shpejtësinë e shitjes së plotë të emetimit si elemente kyçe të arritjes së operacionit.
