Në emisionin investigativ “Fiks Fare” është raportuar një ankesë nga nxënësit e gjimnazit “Rifat Manjani” në Durrës, të cilët akuzojnë mësuesin e anglishtes, Shkëlzen Suma, për paraqitje të dehur në orët e mësimit. Nxënësit thonë se ai i bullizonte dhe i kërcënonte me nota të ulëta, ndërsa orët e tij zhvilloheshin në mënyrë të papërshtatshme.
Për të verifikuar këto akuzat, ekipi i “Fiks Fare” xhiroi një video ku profesori shfaqej duke pirë raki dhe birrë para orëve të mësimit. Gazetarët ishin të pranishëm në një lokal pranë shkollës, ku mësuesi dyshohet se zhvillonte aktivitetet e tij. Rreth orës 08:20, ata regjistruan mbërritjen e tij, ku profesori refuzoi një gotë raki sapo pa ekipin.
Kur u pyet për refuzimin, ai u shpreh me arrogancë dhe, pas përballjes me video-provat, justifikoi veprimin me faktin se ishte natyrshëm njeri dhe se videoja ishte e filmuar në një ditë ndryshe. Ndërkohë, gjatë xhirimeve, u kapën edhe shkelje të tjera, si konsumimi i duhanit në ambientet e shkollës dhe komunikimi me nxënësit me duhan në dorë, veprime që shkelin rregulloren.
Një nxënës deklaroi se profesori i shantazhon dhe se niveli i tij mësimor ishte i dobët. Drejtori i gjimnazit, Arjan Kaja, shprehu mosdijen për veprimet e profesor Suma, por e dënoi konsumimin e alkoolit para mësimeve.
Drejtoria Rajonale e Arsimit Parauniversitar në Durrës reagoi duke ngritur një grup pune për të hetuar akuzat e nxënësve dhe prindërve. Pas një hetimi të brendshëm, u arrit në përfundimin se profesori kishte bërë shkelje të etikës në punë dhe si pasojë, ndaj tij u mor masa disiplinore “Largim nga Puna”. Ky rast ka nxjerrë në pah një problematike të rëndë në sistemin arsimor lokal dhe mbetet për t’u parë si do të trajtohet situata në të ardhmen.
