Një qytetar nga Tropoja ka denoncuar në emisionin “Fiks Fare” telekanalen një klinikë private të syrit, Indian Eyee Clinic, për një ndërhyrje të gabuar me lazer që i ka rrezikuar shikimin. Ai solli rastin e tij, duke shpjeguar se kishte shkuar për të kryer procedurën në syrin e majtë, i cili kishte vetëm 25 për qind shikim. Klinikës i ishte premtuar një përmirësim deri në 80 për qind pas ndërhyrjes.
Pas operacionit, qytetari vuri re se shikimi i tij nuk kishte përmirësuar, por kishte përkeqësuar. Ai ka tentuar të kontaktojë klinikën për të kërkuar shpjegime dhe zgjidhje, madje edhe kthimin e parave, por nuk ka marrë asnjë përgjigje konkrete. Gjatë një bisede me një nga mjekët e klinikës, ai u informua se mund të kishte pasur një ngatërresë në matjen e syrit. Mjekja kishte konstatuar në dokumentacion se shikimi i regjistruar ishte 80 për qind, ndoshta për syrin e djathtë, ndërsa ndërhyrja ishte kryer në syrin e majtë.
Më tej, një mjek i huaj i klinikës sugjeroi që ndoshta qytetari kishte parë më mirë me syrin e djathtë gjatë matjeve, duke ndikuar në rezultatin e matjes. Si zgjidhje, ai iu rekomandua të bëjë terapi në shtëpi, duke mbajtur syrin e djathtë të mbyllur për orë të tëra në mënyrë që të stimulojë syrin e majtë. Qytetari, megjithatë, tha se pas zbatimit të këshillës nuk kishte vënë re asnjë përmirësim dhe se ia kishin sugjeruar thjesht të përdorë disa pika për qetësimin e syrit.
Ai kërkon ndërhyrjen e institucioneve përgjegjëse dhe shprehet se duhen marrë masa, pasi mund të ketë edhe pacientë të tjerë që kanë përjetuar të njëjtin fat. “Nuk dua ta përjetojë askush tjetër atë që po kaloj unë. Bëhet fjalë për shikimin,” thekson ai, duke kërkuar përgjegjësi nga klinika.
