Mbledhja e Këshillit të FIFA e zhvilluar të enjten në Zyrih nxori në pah përçarjen dhe tensionin që po dominojnë në futboll. Sektori më kritik ndaj Gianni Infantinos, me UEFA-në në krye, doli nga takimi i bindur për nevojën e gjetjes së një kandidati që të garojë kundër tij në zgjedhjet presidenciale të FIFA-s vitin e ardhshëm, sipas të përditshmes spanjolle AS. Megjithatë, ende nuk ka dalë ndonjë emër që të rivalizojë seriozisht Infantinon, dhe fakti që ka vetëm një muaj për të paraqitur kandidaturën forcon pozicionin e zviceranit, i cili beson se do të marrë mbështetjen e nevojshme.
Gjatë më shumë se tre orë e gjysmë diskutimesh, peshat kryesore të futbollit botëror diskutuan për të riparuar një krisje që duket e vështirë për t’u tejkaluar. Infantino dha shpjegime dhe shfaqi një lloj pendimi për projektin e dështuar të FFE, por kjo nuk mjaftoi për kritikët e tij. Presidentja e Federatës Angleze të Futbollit, Debbie Hewitt, deklaroi: “Nuk morëm asnjë përgjigje për atë që kërkuam specifikisht.” Infantino premtoi gjithashtu një investim prej 15 milionë për secilën federatë për ciklin e ardhshëm, por oferta financiare nuk duket se shuan shqetësimet e kritikëve më të mëdhenj.
Hapi i parë drejt një sfiduesi zyrtar është bashkëpunimi mes UEFA-s dhe CONCACAF për të gjetur një kandidat bindës me mbështetje të gjerë. Emrat Al Khelaifi dhe Montagliani janë përjashtuar nga lista e mundësive, dhe aktualisht po përmenden Lisa Klaveness dhe Michele Kang si kandidatë potencialë. Së fundi, është shtuar edhe emri i Arsene Wenger, megjithëse futbolli evropian preferon që sfiduesi të vijë nga një konfederatë tjetër. Afati për t’u zyrtarizuar emri i kandidatit që do të rivalizojë Infantinon mbyllet më 18 nëntor, për t’u përballur në zgjedhjet e 18 marsit 2027 në Rabat.
