FIFA po shqyrton mundësinë që të bëjë të detyrueshme praninë e të paktën një lojtari nën 21 vjeç në formacionin titullar. Propozimi, i hartuar nga komisione të ndryshme, ka shumë gjasa të nisë zbatimin nga viti 2027 dhe pritet të ndikojë ndjeshëm në botën e futbollit. Konsultimet e para janë kryer dhe Këshilli i FIFA-s ka dhënë miratimin fillestar; burime anonime bëjnë me dije se ka pasur diskutime pozitive ndërmjet presidentëve të gjashtë konfederatave.
Qëllimi kryesor i këtij ndryshimi është nxitja e zhvillimit të talenteve të reja. Diskutimet e ardhshme do të përqendrohen te përkufizimi i saktë i “lojtarit vendas” (home-grown player), pasi aktualisht ekzistojnë dallime të mëdha mes konfederatave dhe FIFA synon të vendosë një model të përbashkët për të inkurajuar aktivizimin e rregullt të të rinjve në ndeshje zyrtare. Rregullat ekzistuese, si ato të Premier League, kërkojnë që në listën prej 25 lojtarësh një ekip të ketë jo më shumë se 17 lojtarë “jo vendas”, duke lënë tetë vende për ata që plotësojnë kriteret e rritjes në akademi; megjithatë, këto rregulla nuk përfshijnë specifikisht lojtarët U21 dhe nuk përcaktojnë mënyrën e aktivizimit të tyre në fushë.
Gjatë këtij sezoni, Newcastle, Manchester City dhe Manchester United kanë regjistruar më shumë minuta me lojtarë anglezë nën 21 vjeç. Manchester United veçohet për një rekord historik—përfshirjen e të paktën një lojtari të akademisë në skuadër për 88 vite rresht. Në anën tjetër, klube si Leeds dhe Burnley nuk kanë aktivizuar asnjë lojtar të kësaj kategorie në ligë gjatë sezonit 2025-26.
Kuota e propozuar mund të ndryshojë rrënjësisht strategjitë në tregun e transferimeve, pasi lojtarët e rritur në akademi përbëjnë “fitim të pastër” për klubet në rast shitjeje dhe shpesh përdoren për të shmangur shkeljet e Rregullave të Rentabilitetit dhe Qëndrueshmërisë Financiare (PSR). (Top Channel)
