Viti shkollor 2025-2026 në qarkun e Fierit do të fillojë me rreth 2000 nxënës të regjistruar në klasat e para. Prindërit kanë pasur mundësinë për regjistrimin e fëmijëve të tyre përmes portalit e-Albania nga 10 korriku deri më 5 shtator. Ndërkohë, për shkak të rritjes së numrit të nxënësve, vetëm 1% e tyre do të ndjekin mësim në turnin e dytë në dy shkolla të bashkisë Fier. Nxënësit e tri shkollave publike në Lushnjë dhe Divjakë do të transferohen përkohësisht në shkolla të afërta, pasi godinat e tyre do të rikonstruktohen.
Gjatë vitit 2024-2025 janë përfunduar rikonstruksionet e pesë shkollave, dy në Fier, dy në Lushnjë dhe një në Divjakë, që do të pranojnë nxënësit në mjedise të reja dhe të pajisura me material didaktik. Një tjetër shkollë në Mallakastër do të përfundojë rikonstruksionin në fillim të vitit shkollor 2025-2026. Të gjithë nxënësit e klasave VI-IX do të pajisen me tekste falas, ndërsa ata që kanë tekste të dëmtuara do t’i zëvendësojnë ato me libra të rinj. Nxënësit e arsimit fillor gjithashtu do të marrin tekste të reja falas.
Programi SmartLab do të vazhdojë në 15 shkolla 9-vjeçare publike dhe do të shtrihet për herë të parë deri në klasën e katërt, me laboratorë modernë të instalura për të mbështetur mësimin e teknologjisë. Po ashtu, 10 shkolla të tjera vazhdojnë të zbatojnë programin Element IT për kodimin.
Programi “Art, zeje, sport” do të zgjerohet me 16 shkolla të tjera, duke ofruar aktivitetet jashtë orarit për më shumë se 3500 nxënës, të cilët do të kenë mundësinë të marrin pjesë në 46 klube jashtëshkollore që përfshijnë fusha si arti, muzika dhe sportet. Këto iniciativa synojnë të përmirësojnë cilësinë e arsimit dhe të angazhojnë nxënësit në aktivitete të ndryshme kulturore dhe sportive.
