Mëngjesin e kësaj të hëne, dhjetëra fermerë protestuan pranë “Rotondo e Kafaraj” në aksin Levan-Tepelenë për shkak të çmimeve të ulëta të luleshtrydhes. Të mbledhur nga të gjitha fshatrat e njësisë administrative Frakull, fermerët shprehen se kjo është periudha më e keqe ndonjëherë për kultivuesit e luleshtrydhes, me çmimin që bie deri në 500 lekë për arkë. Ata poashtu përballen me një përgjysmim të prodhimit për shkak të faktorëve të tjerë si ngricat, lagështira dhe përmbytjet.
Protestuesit kritikojnë politikat e pikave të grumbullimit, të cilat sipas tyre, përcaktojnë çmimin sipas dëshirës së tyre, duke tregtuar me çmime dyfish më të larta. Fermerët e hodhën poshtë gjithashtu shqetësimin se luleshtrydhet vendase përmbajnë pesticide.
Në këtë kontekst, ata bëjnë thirrje për ndihmë nga institucionet e përgjegjshme dhe kërkuan që Ministria e Bujqësisë të kontrollojë çmimin në dogana. Fermerët shprehen se nëse nuk do të ndërmerren masa konkrete për të zgjidhur këtë situatë të vështirë, ata do të vazhdojnë me protestat.
