Partizani ka në dorë historinë e tij dhe suksesin që mund të sjellë shumë të ardhura për buxhetin e klubit. Të kuqtë do të përballen me Bate Borisov në ndeshjen e dytë, teksa e para u mbyll me shifrat 1-1.
Në atë takim u pa qartësisht se bjellorusët nuk janë në nivel të lartë dhe me pak më shumë kujdes, Partizani mund ta kishte hedhur një këmbë në raundin tjetër. Megjithatë ndeshja e kthimit do të luhet në një terren neutral, në Hungari.
Nëse Partizani kalon më tej, do të përballet me Aris Limasol. Ky kundërshtar është mëse i kalueshëm nëse flasim për vështirësinë që ka raundi i 2 i Champions League. Qipriotët kushtojnë vetëm 17 milionë euro sipas “Transfermarkt” dhe nuk kanë asgjë më shumë sesa Partizani për t’u trembur dhe për ta quajtur një mision të pamundur.
Nëse kampionët e Superiores do të barazonin në një takim dhe do të fitonin në tjetrën, sigurojnë përfundimisht grupet e Conference League. Kjo pasi Partizani do të kalonte në turin e tretë të Champions League dhe do të siguronte njëkohësisht kalimin në “Play Off” të Europa League dhe automatikisht grupet e “Conference League”.
Pra nëse Partizani do të eliminohej nga turi i tretë i Champions League, do të luante ndeshjen e fundit për kalimin në grupet e “Europa League”. Nëse dështonte edhe aty, atëherë e ka të siguruar grupet e Conference League. Shansi është i artë dhe të kuqtë e dinë se këtë herë duhet të jepet maksimumi.
