Të paktën 150 persona u arrestuan të hënën në Turqi pasi policia shpërndau një tubim pranë gjykatës së Çağlayan në Stamboll, ku demonstruesit protestonin kundër arrestimeve të fundit të anëtarëve të komunitetit LGBTQ+. Sipas dëshmitarëve të cituar nga Reuters dhe Agence France-Presse, protestuesit përpiqeshin të jepnin deklarata për median jashtë gjykatës, por u penguan nga policia. Ata mbanin një banderolë me mbishkrimin “Të jesh LGBTQ+ dhe të organizohesh nuk është krim” dhe brohorisnin sloganet para ndërhyrjes së forcave të rendit.
Arrestimet janë pjesë e një operacioni më të gjerë të autoriteteve turke kundër komunitetit LGBTQ+, që përfshin bastisje të zyrave të organizatave, bllokimin e faqeve të internetit dhe ndalimin e personave të dyshuar në disa provincia. Operacioni zhvillohet nën fushatën “Familja ime është e sigurt”, të cilën qeveria thotë se e ka si qëllim mbrojtjen e fëmijëve dhe vlerave familjare. Në kuadër të të njëjtit operacion, një gjykatë turke urdhëroi paraburgimin e 16 personave në provincën e Izmirit.
Ministri i Drejtësisë, Akin Gürlek, deklaroi se hetimet, të koordinuara nga prokurorët në Stamboll, Ankara, Izmir, Ajdin dhe Mersin, synojnë 162 të dyshuar, nëntë shoqata dhe 13 biznese në 15 provinca. Autoritetet arrestuan gjithashtu të paktën 26 persona në Stamboll dhe 21 në Ankara gjatë fundjavës, ndërsa kryen bastisje në zyrat e organizatave LGBTQ+.
Përveç arrestimeve dhe bastisjeve, autoritetet turke kanë bllokuar aksesin në faqet e internetit dhe llogaritë në rrjetet sociale të disa organizatave LGBTQ+, individëve dhe mediave të pavarura, përfshirë llogarinë në X të Amnesty International Turkey. Partia pro-kurde DEM dënoi operacionin ndaj komunitetit LGBTQ+.
Komisioneri i Këshillit të Evropës për të Drejtat e Njeriut, Michael O’Flaherty, shprehu shqetësim për arrestimet, bastisjet dhe kufizimet e internetit që kanë ndikuar organizatat LGBTQI+ dhe mbrojtësit e të drejtave të njeriut, duke thënë se “vlerat familjare” apo “mbrojtja e fëmijëve” nuk mund të përdoren për të justifikuar kufizime të të drejtave të njeriut dhe duke kërkuar lirimin e të ndaluarve për aktivitetet e tyre civile. Një ditë më parë edhe Bashkimi Evropian shprehu shqetësim për arrestimet dhe procedurat ligjore kundër aktivistëve LGBTI+ në Turqi.
Veprimi kundër komunitetit vjen ndërsa Presidenti Rexhep Tajip Erdogan promovon fushatën “Dekada e Familjes dhe Popullsisë” për të adresuar rënien e lindshmërisë; homoseksualiteti nuk kriminalizohet në Turqi, por organizatat e të drejtave të njeriut denoncojnë diskriminim dhe presion ndaj komunitetit, ndërsa Erdogan është shprehur publikisht kundër personave LGBTQ+ dhe i ka lidhur me rënien e lindjeve.
