Fatura e borxheve tatimore e doganore të papaguara për periudhën 10-vjeçare arrin në 507 milionë euro, sipas një projektiligji të titulluar “Ligji për fshirjen, shuarjen dhe pagesën e detyrimeve tatimore ndaj administratës tatimore qendrore dhe detyrimeve të pagueshme në doganë”, që ka nisur procedurat e konsultimit me grupet e interesit.
Ky ligj parashikon fshirjen e plotë të detyrimeve tatimore që u përkasin periudhave deri më 31 dhjetor 2014, përveç kontributeve për sigurimet shoqërore dhe shëndetësore. Megjithatë, për këto kontribute, do të fshihen vetëm dënimet administrative dhe kamatëvonesat. Një aspekt i rëndësishëm është falja e gjobave dhe kamatëvonesave nëse është paguar detyrimi kryesor.
Sipas të dhënave nga Ministria e Financave, detyrimet e vjetra mbi 10 vjet deri në fund të 2014 kapin vlerën 507.3 milionë euro, ndarë në 295 milionë euro borxhe tatimore dhe 257.6 milionë euro borxhe doganore. Për periudhën deri më 31 dhjetor 2014, detyrimet tatimore dhe doganore do të fshihen, përveç sigurimeve, por do të dalin ndihma të kushtëzuar për periudhën 1 janar 2015 – 31 dhjetor 2019, ku subjekti duhet të paguajë një pjesë për të përfituar nga lehtësitë.
Për periudhën 1 janar 2020 – 31 dhjetor 2024, nuk do të fshihen borxhet kryesore, por gjobat dhe kamatë do të fshihen nëse paguhet detyrimi i plotë deri më 31 dhjetor 2026. Rreth 207 mijë tatimpagues debitorë preken nga kjo nismë, megjithatë përjashtohen ata që kanë pasur vendim gjyqësor të formës së prerë ose janë në procese gjyqësore për vepra penale në fushën tatimore ose doganore.
Shifra totale e borxheve të papaguara për tatime dhe dogana arrin në 211 miliardë lekë, ose 1.7 miliardë euro. Nisma e “Paqjes Fiskale” fokusohet në fshirjen e detyrimeve shumë të vjetra deri më 31 dhjetor 2014 në vlerën 507 milionë euro. Kjo nismë, e cila synon përmirësimin e financave publike, ka kushte të qarta përfitimi, duke e bërë përfitimin jo gjithëpërfshirës.
