Dëmet nga zjarri do të ishin më të pakta nëse materiali i fasadës do të plotësonte standardet e sigurisë. Inxhinierët e ndërtimit theksojnë se ndërtuesit shpesh shkelin kushtet urbanistike dhe përdorin materiale të lira që nuk përmbushin kriteret për mbrojtjen nga zjarri. Eksperti për mbrojtjen nga zjarri, Mariglen Sakolli, shprehet se ndërtuesit prioritizojnë kursimin e kostove mbi sigurinë.
Inxhinierja Luljeta Bozo thekson se ndërtimi ka rregulla strikte që duhet të respektohen për të mbrojtur jetën e njerëzve, duke theksuar se materiali i fasadës duhet të jetë i padjegshëm, pavarësisht kostos. Ajo kritikon sistemin e kontrollit në Shqipëri, duke thënë se asnjë material ndërtimi nuk duhet të përdoret pa certifikatën e cilësisë.
Pavarësisht zjarrit, struktura e ndërtesës nuk u prek, duke lejuar banorët të rikthehen në apartamentet e tyre. Bozo sqaron se kapota nuk është strukturë dhe kolonat kanë mbetur të padëmtuara. Ngjarje të tilla janë të përsëritura dhe shërbejnë si alarm për sigurinë e banorëve dhe investimet e tyre në apartamente dhe biznese.
