Paqja mes Kimi Antonellit dhe George Russell u mbyll zyrtarisht në ndalesën e pestë të Botërorit të Formula 1, Çmimin e Madh të Kanadasë, pasi të dy pilotët e Mercedes u përfshinë në një duel të tensionuar gjatë Garës Sprint. Antonelli akuzoi shokun e skuadrës se e shtyri jashtë në një manovër që sipas tij “nuk ishte korrekt” dhe kërkoi që të penalizohej: “Më shtyu jashtë, nuk ishte korrekt. Duhej penalizuar”. Russell i përgjigj me ironi, duke thënë se kishte vepruar saktë dhe se Antonelli kishte qenë “optimist për të më parakaluar në atë pikë”.
Gjatë garës, Antonelli u ankua edhe përmes radios, duke thënë: “Nëse jemi të autorizuar të duelojmë në këtë mënyrë, është mirë ta dimë”, një deklaratë që çoi në ndërhyrjen e shefit të skuadrës, Toto Wolff, i cili në pistë i tha italianit: “Ti shiko të drejtosh makinën, flasim më vonë”.
Pas garës, Wolff mori të dy pilotët dhe u përpoq t’u shpjegonte situatën, duke folur edhe për Sky Sports mbi atë çfarë kishte ndodhur. Ai deklaroi se gjithçka shkoi mirë dhe se beteja mes pilotëve ishte pjesë e sportit: “Shkoi mirë, ashtu siç duhet të jetë në sport; çdo betejë na mëson diçka”, tha ai. Wolff rikujtoi se situata të ngjashme ishin përjetuar më parë edhe me çiftin Rosberg–Hamilton, dhe theksoi nevojën për të sqaruar mënyrën sesi skuadra dëshiron të garojë: “si duam të garojmë? do të garojmë ndaj makinës tjetër sikur të ishte e një skuadre tjetër? … dhe të mos lini hapësira? Apo preferoni të lini hapësirë… Apo preferoni një garë të qetë ku parakaloni njëri-tjetrin vetëm në vijën e drejtë apo në frenim?”
Më tej, Wolff iu referua edhe stilit të garës së Max Verstappen dhe përmendi se duhet të pyesin veten nëse do të pritej nga një pilot si ai: “Duhet të pyesin njëri tjetrin ‘a do të linte Max hapësira aty?’ Jo. A do të hapte krahun apo të linte hapësira të mjaftueshme për t’u parakaluar në kthesën 1? Jo, nuk do ta bënte”. Ai përfundoi duke thënë se është e rëndësishme që pilotët të vendosin vetë se si të garojnë kundër njëri-tjetrit dhe se rregullat aktuale për skuadrën nuk përbënin problem.
