Në takimin e 22-të të Komitetit Parlamentar të Stabilizim-Asociimit Shqipëri-Bashkimi Europian, zhvilluar sot në Tiranë, eurodeputetja Isabel Wiseler Lim shfaqi shqetësim lidhur me mosheqjen e imunitetit të ministres Belinda Balluku. Ajo vlerësoi punën e Prokurorisë së Posaçme kundër Korrupsionit dhe Krimit të Organizuar (SPAK), duke theksuar se ky institucion gëzon një nivel të lartë besimi te qytetarët shqiptarë dhe se ka pasur sukses brenda reformës në drejtësi.
Wiseler Lim vuri në dukje se, pavarësisht besimit ndaj SPAK-ut dhe rezultateve të arritura, mbeten pyetje mbi mënyrën se si sigurohet pavarësia e institucioneve të drejtësisë dhe nëse reforma në drejtësi do të jetë e pakthyeshme. Ajo kujtoi praninë e saj në maj si vëzhguese e zgjedhjeve, kur përfaqësuesit shqiptarë ishin në fushatë, ndërsa tani i sheh si kolegë parlamentare dhe mund të bisedojnë si ligjvënës.
Eurodeputetja theksoi se SPAK-u është një nga institucionet për të cilat shqiptarët kanë më shumë besim dhe se suksesi i tij është pjesë e reformës në drejtësi që ka marrë dakordimin e palëve. Megjithatë, ajo theksoi se pavarësia nuk sigurohet menjëherë: procedurat për imunitetin, për shembull, vendosen në këtë forum parlamentar, dhe çdo hetim apo nisje e tij do të vendoset këtu. Po ashtu, ajo kujtoi se anëtarët e Këshillit të Prokurorisë dhe të Gjyqësorit zgjidhen nga parlamenti, duke nënkuptuar një lidhje të rëndësishme mes legjislativit dhe organeve të drejtësisë.
Wiseler Lim e përshkroi detyrën e sigurimit të pavarësisë institucionale si jo të lehtë dhe ngriti si pyetje nëse reforma në drejtësi do të jetë e pakthyeshme. Ajo shprehu besimin e saj se përgjigjja është po, duke theksuar rëndësinë e ruajtjes së arritjeve të reformës dhe të besimit të publikut në institucionet e reja të drejtësisë.
