Në kulmin e sezonit turistik dhe në fillim të gushtit, euro ka rënë në nivelin më të ulët të viteve të fundit për shkak të flukseve të larta valutore që vijnë nga turistët, emigrantët dhe aktiviteti sezonal, të cilat kanë rritur ofertën e euros në treg. Sipas Bankës së Shqipërisë, euro arriti në 93.28 lekë, niveli më i ulët i regjistruar; në blerje këmbehet me 92.97 lekë dhe në shitje me 93.61 lekë. Në pikat e këmbimit valutor euro po blihet edhe me 92.4 lekë, shifra që shënon rënien më të madhe të viteve të fundit. Krahasuar me të njëjtën periudhë të një viti më parë, kur euro këmbehej me 97.32 lekë, monedha europiane ka humbur 4.04 lekë në vlerë.
Zhvlerësimi i euros ka ndikime të ndryshme në ekonomi. Më të favorizuar rezultojnë qytetarët dhe bizneset që paguajnë në euro, përfshirë ata me kredi në euro, importuesit dhe udhëtarët jashtë vendit. Përkundrazi, eksportuesit, sektori i turizmit që arkëton në euro dhe familjet që marrin remitanca nga emigracioni përfitojnë më pak lekë për të njëjtën sasi euroshe.
Rezervat valutore të vendit janë rritur, duke arritur një rekord prej 7.669 miliardë euro, niveli rreth 889 milionë euro më i lartë se një vit më parë. Për të frenuar zhvlerësimin e mëtejshëm të euros, Banka e Shqipërisë ka intensifikuar ndërhyrjet në tregun valutor. Vetëm në tremujorin e parë të këtij viti, banka qendrore bleu 95.5 milionë euro, gati trefish më shumë se në të njëjtën periudhë të vitit të kaluar, kur u blenë 33.2 milionë euro. Për vitin 2026, Banka e Shqipërisë ka planifikuar të blejë nga tregu midis 330 dhe 450 milionë euro, një objektiv më i lartë se ai i vitit të kaluar.
